სამართალი

სპეცოპერაციის დროს დაკავებულის აღკვეთის ღონისძიებას დღეს შეუფარდებენ

გაბრიელ სალოსის ქუჩაზე სპეცოპერაციის დროს დაკავებულის სასამართლო პროცესი თბილისის საქალაქო სასამართლოში დღეს 13:00 საათისთვისაა ჩანიშნული.

აღკვეთის ღონისძიების შეფარდების საკითხზე მოსამართლე რომან ხორავა იმსჯელებს.

საქართველოს პროკურატურა ბრალდებულისთვის აღკვეთის ღონისძიებად პატიმრობის შეფარდებას ითხოვს.

ბრალდებულის ადვოკატი იმედა ქარქაშაძე ჯერ არ აკონკრეტებს, რა შუამდგომლობით მიმართავს დაცვის მხარე სასამართლოს.

ქარქაშაძის თქმით, მისი დაცვის ქვეშ მყოფი ბრალს არ აღიარებს.

პროკურატურის ცნობით, სპეცოპერაციის დროს დაკავებულს უცხო ქვეყნის ტერორისტულ ორგანიზაციაში გაერთიანებასა და ტერორისტულ საქმიანობაში მისი დახმარებისთვის, ასევე ცეცხლსასროლი იარაღის, საბრძოლო მასალის, ფეთქებადი ნივთიერების და ასაფეთქებელი მოწყობილობის ტერორისტული მიზნით, მართლსაწინააღმდეგო შეძენა, შენახვა ტარებისთვის წარედგინა ბრალდება საქართველოს სისხლის სამართლის კოდექსის 328-ე და 323 პრიმა მუხლის პირველი ნაწილით, რაც სასჯელის სახედ და ზომად თავისუფლების აღკვეთას 10-დან 17 წლამდე ვადით ითვალისწინებს.

ნინო ექვთიმიშვილი