მსოფლიო

სტამბულში ღამის კლუბის თავდასხმაზე დაკავებულმა პირმა დანაშაული აღიარა

სტამბულის გუბერნატორის ვასიპ შაჰინის განცხადებით, უზბეკეთის მოქალაქემ აბდულკადირ მაშარიპოვმა აღიარა, რომ ახალ წელს თავს დაესხა ღამის კლუბს. შაჰინმა დაამატა, რომ დაკავებულის თითის ანაბეჭდები ემთხვევა თავდასხმის ადგილას აღმოჩენილს, ასევე ის გადიოდა მომზადებას ავღანეთში.

სტამბულის გუბერნატორის თქმით, 2016 წლის იანვარში მაშარიპოვი არალეგალურად ჩავიდა თურქეთში. მასთან ერთად დააკავეს ერაყის მოქალაქე და სამი ქალი. სულ ღამის კლუბ Reina-ზე მომხდარი თავდასხმის ფაქტზე 50 ადამიანი დააკავეს.

შაჰინის განცხადებამდე თურქული მედია ავრცელებდა ინფორმაციას, რომ პოლიციამ მაშარიპოვი სტამბულის რაიონ ესენიურტში აღმოაჩინა.

ტელეარხ TRT - ის ინფორმაციით, მასთან ერთად იყო მისი 4 წლის ვაჟი. ტელეკომპანია NTV-მ კი გამოაცხადა, რომ მაშარიპოვი დააკავეს მისი ყირგიზი მეგობრის სახლში.

მედიაში ასევე გავრცელდა მამაკაცის ფოტო სახეზე სილურჯეებითა და სისხლის კვალით.

მედიის ინფორმაციით, დაკავებული ბინას ქირაობდა თურქეთის ქალაქ კონიაში ცოლთან და ორ შვილთან ერთად.

შეგახსენებთ, რომ ახალი წლის ღამეს შეიარაღებულმა მამაკაცმა ცეცხლი გაუხსნა ღამის კლუბ Reina-ში მყოს ადამიანებს. შემთხვევას 39 ადამიანი ემსხვერპლა, 10-ობით კი დაშავდა.

თურქეთის მთავრობამ თავდასხმას ტერაქტი უწოდა. მოგვიანებით ტერორისტულმა დაჯგუფება “ისლამურმა სახელმწიფომ“ განაცხადა, რომ ეს იყო შურისძიება თურქეთის მიერ სირიაში განხორციელებული მოქმედებების გამო.

ანა მებურიშვილი