პოლიტიკა
ტატუნაშვილის საქმეზე კარასინმა ის თქვა, რასაც ველოდი - ზურაბ აბაშიძე
რუსეთთან ურთიერთობების საკითხებში საქართველოს პრემიერ-მინისტრის სპეციალურმა წარმომადგენელმა ზურაბ აბაშიძემ რუსეთის საგარეო საქმეთა მინისტრის მოადგილე გრიგორი კარასინთან შეხვედრა შეაფასა. აბაშიძის თქმით, მხარეებმა არჩილ ტატუნაშვილის მკვლელობაზე იმსჯელეს.
პრემიერის სპეციალური წარმომადგენლის თქმით, კარასინმა ის თქვა, რაც მოსალოდნელი იყო.
„რუსმა კოლეგამ განაცხადა, რომ ეს ძალიან სამწუხარო ფაქტია და ყველაფერი უნდა გაკეთდეს იმისთვის, რათა ასეთი რამ აღარ განმეორდეს. მან თქვა ის, რასაც ველოდი, რომ ამაზე საუბარი უნდა გაგრძელდეს ჟენევის ფორმატში“, - განაცხადა აბაშიძემ.
ქართველი დიპლომატის თქმით, დღევანდელ შეხვედრაზე აფხაზეთის გავლით რკინიგზის აღდგენის თაობაზე საუბარი საერთოდ არ ყოფილა.
დღევანდელი შეხვედრა ოკუპირებულ ტერიტორიაზე არჩილ ტატუნაშვილის მკვლელობის შემდეგ პირველად გაიმართა.
ქართულ-რუსული დიალოგის ფარგლებში პრაღის ფორმატი 2012 წლიდან არსებობს.