საზოგადოება

თავად დაზარალებულებმა უნდა გამოთქვან მოლაპარაკებების გაგრძელების სურვილი - გუკა რჩეულიშვილი

დღეს პროკურატურაში „ცენტრ-პოინტის“, m2-ის, „ცენტრ-პოინტის“ დაზარალებულებისა და პროკურატურის წარმომადგენლების შეხვედრა გაიმართა. m2-მა, რომელიც „ცენტრ-პოინტის“ აქტივების ყიდვას გეგმავს, წარუდგინა დაზარალებულებს გეგმა, როგორ იქნება დაკმაყოფილებული მათი მოთხოვნები.

დაზარალებულების ინფორმაციით, კომპანია გეგმავს 2020 წლისთვის ყველა ობიექტის დასრულებას. მათი თქმით, მათ თეთრი კარკასის მაგივრად შავ კარკასს სთავაზობენ, თუმცა, სავარაუდოდ, ისინი წინადადებას დათანხმდებიან. მიუხედავად ამისა, დაზარალებულები ეწინააღმდეგებიან საპროცესო შეთანხმების გაფორმებას. მათი თქმით, მშენებლობების დასრულებამდე რუსუდან კერვალიშვილი და მაია რჩეულიშვილი ციხეში უნდა ისხდნენ.

„ცენტრ-პოინტის“ სამეთვალყურეო საბჭოს ხელმძღვანელის, გუკა რჩეულიშვილის განცხადებით, მხარეებს შეთანხმებისთვის არ მიუღწევიათ, ხოლო საბოლოო გადაწყვეტილება დაზარალებულებს ეკუთვნით.

„ჯერჯერობით არანაირ პოზიციაზე არ შევთანხმებულვართ. დაზარალებულებს შევთავაზეთ გამოსავალი. ახლა მათი გადასაწყვეტია, თანახმა არიან თუ არა. ასეთი ჩიხური მდგომარეობიდან ეს ერთადერთი გამოსავალია. ამ მომენტში უკეთესს ვერცერთ მხარეს ვერ შევთავაზებთ.

კომპანია, რომელიც იყიდის „ცენტრ-პოინტს“, რა თქმა უნდა, გამოთქვამს მზადყოფნას, ყველა დაზარალებული დაკმაყოფილდეს. მაგრამ, უპირველეს ყოვლისა, თავად დაზარალებულებმა უნდა გამოთქვან მოლაპარაკებების გაგრძელების სურვილი“, - განაცხადა რჩეულიშვილმა.

რჩეულიშვილის განცხადებით, თუ გარიგება შედგება, მას შემდეგ გაფორმდება საპოროცესო შეთანხმება.

ანა მებურიშვილი