სამართალი

თიანეთის მერის არჩევნებში თამაზ მეჭიაურის გამარჯვების გადაწყვეტილების შესახებ საჩივარს სააპელაციო სასამართლოში დღეს განიხილავენ

სააპელაციო სასამართლო თიანეთის საარჩევნო ოლქის შედეგებზე სავარაუდოდ დღეს იმსჯელებს.

საუბარია, მცხეთის რაიონული სასამართლოს გადაწყვეტილებაზე, რომლის თანახმადაც, თიანეთის ოლქში მერობის კანდიდატმა თამაზ მეჭიაურმა გაიმარჯვა.

აღნიშნული გადაწყვეტილება თბილისის სააპელაციო სასამართლოში გასაჩივრდა და გუშინ ოფიციალურად დარეგისტრირდა.

საქმის განხილვა დღეს, 15:00 საათისთვისაა ჩანიშნული.

„დემოკრატიულ ინიციატივათა საერთაშორისო ცენტრი“ მე-20 უბნის კენჭისყრის სრულად გაბათილებას ითხოვს.

„სახეზე გვაქვს ორი სხვადასხვა შედეგი და გაურკვეველი და ბუნდოვანია, თუ რომელი შედეგი უნდა მივიღოთ ჩვენ სარწმუნოდ იმისთვის, რომ ჩვენ დავადგინოთ, რომ ამომრჩევლის ნება ნამდვილად იყო გამოხატული,“ - განაცხადა "დემოკრატიულ ინიციატივათა საერთაშორისო ცენტრის" წარმომადგენელმა მერი კაპანაძემ.

ნინო ექვთიმიშვილი