პოლიტიკა

თქვენ უპირისპირდებით მსოფლიოში ერთ-ერთ ყველაზე ძლიერ, გამოცდილ ძალას - რუსულ დიპლომატიას და ამ დაპირისპირებაში ხართ გამარჯვებულები - პრეზიდენტი ქართველ დიპლომატებს

საქართველოს პრეზიდენტის გიორგი მარგველაშვილის თქმით, 2008 წლის რუსეთ-საქართველოს ომიდან მოყოლებული ქართული დიპლომატები წარმატებულად ახერხებენ რუსულ დიპლომატიასთან გამკლავებას.

ამის შესახებ პრეზიდენტმა 2017 წლის ამბასადორიალზე სიტყვით გამოსვლისას ისაუბრა.

გიორგი მარგველაშვილმა მადლობა გადაუხადა დიპლომატებს გაწეული სამსახურისთვის და განაცხადა, რომ ქვეყნის უსაფრთხოება და სუვერენიტეტის შენარჩუნება მათი წარმატებული საქმიანობის შედეგია.

„რეალურად ის გამოწვევა, რომელიც ჰქონდა ქართულ დიპლომატიას 2008 წლიდან, როდესაც ოკუპაციის პარალელურად ჩვენ გვქონდა გამოწვევა საერთაშორისო არენაზე ოკუპირებული რეგიონების აღიარების თვალსაზრისით, ამ დაპირისპირებამ გადაიარა ქართული დიპლომატის მხრებზე და თქვენს ეს დაპირისპირება პირწმინდად მოიგეთ. აქედან გამომდინარე, ჩვენი უსაფრთხოების, დაცულობის, ტერიტორიული მთლიანობისა და სუვერენიტეტის დიდი შემადგენელი ნაწილია ის, რასაც თქვენ აკეთებთ ასე წარმატებულად; უპირისპირდებით მსოფლიოში ერთ-ერთ ყველაზე ძლიერ, გამოცდილ ძალას - რუსულ დიპლომატიას და ამ დაპირისპირებაში ხართ გამარჯვებულები“, - მიმართა პრეზიდენტმა დიპლომატიურ კორპუსს.