პოლიტიკა

ტრეფიკინგთან ბრძოლის კუთხით საქართველო კვლავ იმსახურებს მაღალი დონის შეფასებას - შალვა ხუციშვილი აშშ-ის სახელმწიფო დეპარტამენტის ანგარიშზე

შინაგან საქმეთა მინისტრის მოადგილე, შალვა ხუციშვილი გამოეხმაურა აშშ-ის სახელმწიფო დეპარტამენტის 2017 წლის ანგარიშს ტრეფიკინგთან ბრძოლის შესახებ.

საქართველო მოხვდა პირველ კალათაში, რაც იმას ნიშნავს, რომ ქვეყნის მთავრობა სრულად იცავს ტრეფიკინგთან ბრძოლის მინიმალურ სტანდარტებს.

„ანგარიშში საქართველო კვლავ რჩება ე.წ. პირველ კალათაში, ანუ იმსახურებს ყველაზე მაღალი დონის შეფასებას, როგორც მდგრადი და ეფექტური ძალისხმევის განმახორციელებელი ქვეყანა ტრეფიკინგთან ბრძოლის კუთხით. პოლიციისა და შრომის ინსპექციის თანამშრომლობა განსაკუთრებით არის ამ ანგარიშში აღნიშნული. განსაკუთრებულად არის აღნიშნული კონკრეტული ღონისძიებები, რომლებსაც ახორციელებენ სამთავრობო უწყებები ტრეფიკინგთან ბრძოლის კუთხით“, - განაცხადა ხუციშვილმა.

ანგარიშში აღნიშნულია, რომ საქართველოს მთავრობა უზრუნველყოფს ტრეფიკინგისა და შრომითი ექსპლუატაციის მსხვერპლთა კომპლექსურ დახმარებას, ასევე ახორციელებს ამ მიმართულებით საზოგადოების ცნობიერების ამაღლების კამპანიებს. მიუხედავად ამისა, საქართველოს მთავრობას არ გაუზრდია საკანონმდებლო დონეზე ტრეფიკინგთან ბრძოლის მექანიზმები, ასევე არ გაუზრდია ძალისხმევა, რათა მოხდეს იმ ბავშვების იდენტიფიცირება, რომლებსაც ქუჩაში მათხოვრობასა და დანაშაულის ჩადენას აიძულებენ. ამერიკის სახელმწიფო დეპარტამენტი ურჩევს ქართულ მხარეს, იმუშაოს ამ მიმართულებით.

ანა მებურიშვილი