საზოგადოება

„ცენტრ-პოინტის“ საქმეში m2-ს აქვს შესაძლებლობა, ჩაერთოს ამ პროცესში, რაც დაზარალებულებისთვის ბინების გადაცემას ითვალისწინებს - დავით გორგილაძე

კომპანია m2-ს არ უყიდია და არც აპირებს „ცენტრ-პოინტის“ შეძენას. ამის შესახებ კომპანიის საზოგაოდებასთან ურთიერთობის სამსახურის წარმომადგენელმა დავით გორგილაძემ განაცხადა.

მისი თქმით, m2-ის ჩართულობა მხოლოდ დაზარალებულებისთვის ბინების გადაცემას ითვალისწინებს.

„კომპანია m2-ს არ უყიდია „ცენტრ-პოინტი“ და არცაა დაინტერესებული მისი შესყიდვით. თუმცა m2-ს აქვს შესაძლებლობა, ჩაერთოს ამ პროცესში, რაც დაზარალებულებისთვის ბინების გადაცემას ითვალისწინებს. m2-მა უკვე საკუთარი ხედვა გააცნო როგორც დაზარალებულ ბინათმესაკუთრეებს, ასევე პროცესში ჩართულ სხვა მხარეებს, თუ როგორ შეიძლება მონაწილეობა მივიღოთ ამ პროცესში, თუმცა ჯერჯერობით არანაირი გადაწყვეტილება მიღებული არ არის, მაგრამ ხაზგასმით შეიძლება გითხრათ, რომ m2 არ ყიდულობს „ცენტრ-პოინტს“. ამ ეტაპზე დამატებითი კომენტარის გაკეთების შესაძლებლკობა არ მაქვს“, - განაცხადა გორგილაძემ.

დღეს პროკურატურაში „ცენტრ-პოინტის“, m2-ის, „ცენტრ-პოინტის“ დაზარალებულებისა და პროკურატურის წარმომადგენლების შეხვედრა გაიმართა. m2-მა წარუდგინა დაზარალებულებს გეგმა, როგორ იქნება დაკმაყოფილებული მათი მოთხოვნები.

დაზარალებულების ინფორმაციით, კომპანია გეგმავს 2020 წლისთვის ყველა ობიექტის დასრულებას. მათი თქმით, მათ თეთრი კარკასის მაგივრად შავ კარკასს სთავაზობენ, თუმცა, სავარაუდოდ, ისინი წინადადებას დათანხმდებიან. მიუხედავად ამისა, დაზარალებულები ეწინააღმდეგებიან საპროცესო შეთანხმების გაფორმებას. მათი თქმით, მშენებლობების დასრულებამდე რუსუდან კერვალიშვილი და მაია რჩეულიშვილი ციხეში უნდა ისხდნენ.