პოლიტიკა

ცვლილებების მთავარი მიზანი არის მთავრობის ეფექტიანობის გაზრდა და ბიუროკრატიის შემცირება - სოზარ სუბარი

ბიუროკრატიული ხარჯების შემცირებაზე როცა ვლაპარაკობთ, ძალიან დიდ ციფრებზე არ უნდა ვიფიქროთ, - განაცხადა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა მთავრობის სხდომის შემდეგ.

მისი თქმით, აქცენტი გაკეთებულია არა ხარჯების შემცირებაზე, არამედ ეფექტიანობის გაზრდაზე.

„ცვლილებების მთავარი მიზანი არის მთავრობის ეფექტიანობის გაზრდა და ბიუროკრატიის შემცირება. ხშირად არის საუბარი ამ სამინისტროების გაერთიანებულ ბიუჯეტებზე. მინდა იცოდეთ, რომ ამ ბიუჯეტების 90% და გაცილებით მეტი არის განსახორციელებელი პროექტები და ამ პროექტების თანხა არათუ უცვლელი რჩება, არამედ პირიქით გაიზრდება კიდევაც სწორედ ბიუროკრატიის შემცირების ხარჯზე.

მაგრამ ბიუროკრატიის შემცირების ხარჯზე როცა ვლაპარაკობთ, რაღაც კატასტროფულ ან ძალიან დიდ ციფრებზე არ უნდა ვიფიქროთ, იმიტომ რომ ძალიან მცირე ნაწილია ამ შემთხვევაში ის, რაც იხარჯება ხელფასებზე. ძირითადად ყველა სამინისტროს ბიუჯეტში მთავარი ნაწილი არის პროექტები, რომელიც ხორციელდება ჩვენი მოქალაქეებისთვის.

ასე რომ, თანხის დაზოგვაზე არ არის აქცენტი გაკეთებული, აქცენტი გაკეთებულია ეფექტიანობაზე. თანხა, ცხადია დაიზოგება, თუნდაც შენობების მიმართულებით, მაგრამ ეფექტიანობის გაზრდა არის ამ შემთხვევაში ყველაზე მნიშვნელოვანი. რაც შეეხება ადამიანებს, ყველა ის ადამიანი, რომელიც არის ეფექტური, ცხადია დარჩება სამინისტროების შერწყმის შემდეგაც და არჩევანი გაკეთდება პროფესიონალებზე“, - განაცხადა სოზარ სუბარმა.

ნინო ექვთიმიშვილი