სამართალი

უაღრესად მნიშვნელოვანია, რომ მირზა სუბელიანი არ მიემალოს გამოძიებას - ოთარ კახიძე ხელისუფლებას

ხორავას ქუჩაზე მოზარდების მკვლელობის საქმეზე შექმნილი დროებითი საპარლამენტო საგამოძიებო კომისიის მდივანმა ოთარ კახიძემ მიმართა ხელისუფლებას, რომ მათ არ დაუშვან, რომ პროკურატურის ყოფილი თანამშრომელი მირზა სუბელიანი გამოძიებას მიემალოს.

„წინასწარი ინფორმაციით, ერთ-ერთი მთავარი ფიგურანტი საგამოძიებო საქმეში გახლავთ მირზა სუბელიანი. სანამ დავიწყებთ საქმის მასალების შესწავლას და სანამ კომისია მიიღებს შესაბამის გადაწყვეტილებებს, უაღრესად მნიშვნელოვანია, რომ მირზა სუბელიანი არ მიემალოს გამოძიებას და უზრუნველყოფილი იყოს მისი გამოცხადება საგამოძიებო კომისიის სხდომაზე ახსნა-განმარტების მისაცემად.

ამიტომ, მინდა მოვუწოდო ხელისუფლების შესაბამის ორგანოებს, რომ იმ შემთხვევაში, თუ არსებობს შესაბამისი მტკიცებულებები ბატონი სუბელიანის მიმალვის საფრთხის თაობაზე, აგრეთვე მტკიცებულებები მოწმეებზე ზემოქმედების თაობაზე, გაატარეთ შესაბამისი ზომები, ვინაიდან კომისიისთვის მისი ახსნა-განმარტება მნიშვნელოვანია", - თქვა კახიძემ.