პოლიტიკა

უკრაინის ეკლესიის ავტოკეფალიას მხარს ვუჭერთ... საქართველოს ეკლესია რეაგირებას მოახდენს მსოფლიო პატრიარქის დადგენილების გამოქვეყნების შემდეგ - მიტროპოლიტი ზოსიმე

წილკნისა და დუშეთის მიტროპოლიტი ზოსიმეს განცხადებით, უკრაინის ეკლესიის ავტოკეფალიის საკითხზე მსოფლიო პატრიარქის დადგენილების შემდეგ, რომელიც იანვარში გამოქვეყნდება, საქართველოს ეკლესია თავის პოზიციას დააფიქსირებს. ამის შესახებ მიტროპოლიტმა ზოსიმემ საპატრიარქოში წმინდა სინოდის სხდომის შემდეგ თქვა.

„მსოფლიო პატრიარქის დადგენილება გამოქვეყნდება და შემდეგ საქართველოს ეკლესია მოახდენს რეაგირებას. ახლა ჩვენ თავი შევიკავეთ“,- განაცხადა მეუფე ზოსიმემ.

კითხვაზე, უჭერენ თუ არა მხარს უკრაინის ეკლესიის ავტოკეფალიას, მეუფემ განაცხადა: „საქართველოს ეკლესია უჭერს მხარს“.

საპატრიარქოში წმინდა სინოდის დღევანდელი სხდომა ორ საათზე მეტხანს გრძელდებოდა. მედიისთვის უცნობია, კონკრეტულად რა საკითხები განიხილეს სხდომაზე.

ჯერჯერობით ასევე უცნობია, თუ როდის გამოქვეყნდება დღევანდელი სინოდის კრების ოქმი.