პოლიტიკა

„უნდა დადგეს „ქართული ოცნების“ გუნდის პასუხისმგებლობის საკითხი“

თბილისის საკრებულოს ფრაქცია „ერთიანი ნაციონალური მოძრაობის“ თავმჯდომარემ ირაკლი ნადირაძემ მოუწოდა საკრებულოს თავმდჯომარეს, რიგგარეშე სხდომა გამართოს, სადაც მეტროსადგურ „ვარკეთილში“ მომხდარ ამბავთან დაკავშირებით იქნება მიწვეული მერიის შესაბამისი სამსახურები.

„უნდა დადგეს „ქართული ოცნების“ გუნდის პასუხისმგებლობის საკითხი, შესაბამისად, ჩვენ ვფიქრობთ, რომ მხოლოდ ფრაქციულ ფორმატში კონკრეტული სამსახურის უფროსის ან უფროსების მოწვევა არ არის საკმარისი, ამიტომ, ჩვენ მივმართავთ საკრებულოს თავმჯდომარეს, რომ მოიწვიოს რიგგარეშე სხდომა, სადაც მოვა ყველა ის კომპეტენტური სამსახური, ყველა ის ადამიანი, ვინც პასუხისმგებელია თბილისში საზოგადოებრივი ტრანსპორტის გამართულობაზე“, - თქვა ნადირაძემ ბრიფინგზე.

მან არ გამორიცხა, რომ საქმე ეხებოდეს კორუფციულ გარიგებას, რადგან მეტროსადგურის სარეაბილიტაციო სამუშაოებზე პასუხისმგებელი შპს „ყვარელრემმშენი“ შესყიდვების სააგენტოს შავ სიაში ფიგურირებდა.

„ტენდერი ჰქონდა მოგებული შავ სიაში მყოფ კომპანიას, რომელმაც ფაქტობრივად უხარისხო სამუშაოები ჩაატარა. 10-წლიანი გარანტია უნდა ჰქონოდა ამ სამუშაოებს, თუმცა ვნახეთ, რომ 4 თვის თავზე ჩამოიშალა.

ფაქტია, რომ შავი სიიდან ამ კომპანიას არ ამოიღებდნენ, რომ არ ყოფილიყო „ოცნების“ მიერ ლობირებული. ფაქტია, რომ ამ კომპანიას მისცეს ასევე სხვადასხვა სამუშაოს განხორციელების უფლება, რამდენიმე მილიონი აქვს მიღებული სახელმწიფოსგან. ის არემონტებდა, როგორც სკოლებს, როგორც ბაღებს, ასევე, შსს-ის ცალკეულ კაზარმასა და ცალკეულ ობიექტებს, შესაბამისად, ეს ბადებს კითხვის ნიშანს, ხომ არ იყო კორუფციასთან საქმე, ხომ არ იყო აქ კონკრეტული ადამიანების მიერ ამ კომპანიის ლობირებასთნ საქმე, ამაზე უნდა გასცეს გამოძიებამ პასუხი“, -თქვა ნადირაძემ.

მეტროსადგურ „ვარკეთილში“ ე.წ. დაკიდული ჭერი დაახლოებით დილის 11-ის ნახევარზე ჩამოიშალა, რის შედეგად 14 ადამიანი დაშავდა. მეტროსადგური 1-წლიანი სარეაბილიტაციო სამუშაოების შემდეგ ექსპლუატაციაში შევიდა 2017 წლის სექტემბერში. ობიექტს არემონტებდა შპს „ყვარელრემმშენი“.

მომხდარზე გამოძიება 240-ე მუხლით მიმდინარეობს, რაც სამთო-სამშენებლო სამუშაოებისას უსაფრთხოების ნორმების დარღვევას გულისხმობს.