პოლიტიკა

უნდა განხორციელდეს მთავარი პროკურორის შერჩევა ისე, რომ ჰქონდეს საზოგადოების მაღალი ნდობა - გიორგი მარგველაშვილი

საქართველოს პრეზიდენტის, გიორგი მარგველაშვილის განცხადებით, ის პროკურორობის კანდიდატებზე პოზიციას არ დააფიქსირებს, რადგან, მთავარია, არჩეული პირი საზოგადოების ნდობით სარგებლობდეს.

„კანდიდატების თაობაზე მსჯელობა და კანდიდატების განხილვა არის ზურგის შექცევა და გაქცევა იმ მთავარი საკითხიდან, რომელიც საზოგადოებამ ნათლად და აქტუალურად დააყენა. ეს საკითხი მდგომარეობდა შემდეგში – უნდა მოხდეს პროკურატურის დეპოლიტიზაცია, უნდა განხორციელდეს მთავარი პროკურორის შერჩევა ისე, რომ ჰქონდეს საზოგადოების მაღალი ნდობა. უნდა მომხდარიყო ამ დროის განმავლობაში საჯარო კონსულტაციები. მე რამდენადაც ვაკვირდები პოლიტიკურ პროცესს, ასეთი საჯარო კონსულტაციები და საზოგადოებრივი განხილვები არ მომხდარა. ცალკე კანდიდატურებზე მსჯელობა არის გაქცევა საზოგადოების შეკვეთიდან, რომ ეს იყოს მაღალი საზოგადოებრივი ნდობით აღჭურვილი პროფესიონალი“, - უთხრა პრეზიდენტმა ჟურნალისტებს.

საპროკურორო საბჭოს იუსტიციის მინისტრის მოვალეობის შემსრულებელმა მთავარი პროკურორობის სამი კანდიდატი წარუდგინა – შალვა თადუმაძე, შალვა შავგულიძე და ნინო გოგნიაშვილი. მთავარი პროკურორობის კანდიდატებს საპროკურორო საბჭოს სხდომაზე ცალ-ცალკე ეყრებათ კენჭი.