კომენტარი

ვენეციის კომისიისგან დადებით დასკვნას ველოდებით - ირაკლი კობახიძე

საქართველოს პარლამენტის თავმჯდომარის ირაკლი კობახიძის განცხადებით, კონსტიტუციის ახალ რედაქციასთან დაკავშირებით ვენეციის კომისიის დასკვნა იქნება პოზიტიური, რადგან წინასწარი პოზიტიური დასკვნა უკვე მიღებულია.

ამის შესახებ კობახიძემ ჟურნალისტებს ვენეციის კომისიის სხდომაზე დასასწრებად გამგზავრებამდე განუცხადა.

მისი თქმით, მას ექნება შეხვედრა კომისიის პრეზიდენტ ჯანი ბუკიკიოსთან და კომისიის მდივან თომას მარკერტთან.

„გვექნება შეხვედრები ვენეციის კომისიის პრეზიდენტთან და ასევე მის გენერალურ მდივანთან, გვექნება საუბარი კონსტიტუციასთან დაკავშირებით, მესამე მოსმენით მიღებულ რედაქციასთან დაკავშირებით და საბოლოო ჯამში, ბუნებრივია, ვისაუბრებთ იმ ტექსტზე, რომელიც დამტკიცდება ვენეციის კომისიის მიერ პლენარულ სხდომაზე. მოლოდინი რა თქმა უნდა, არის პოზიტიური, გამომდინარე იქიდან, რომ ჩვენ უკვე გვაქვს მიღებული წინასწარი დადებითი დასკვნა ჩვენს დოკუმენტთან დაკავშირებით. საბოლოო ჯამში, პლენარულ სხდომაზე დამტკიცდება ის დასკვნა, რომელიც იყო წარმოდგენილი. მხოლოდ მცირე ცვლილებები შეიძლება შევიდეს ამ დასკვნაში, აქედან გამომდინარე, მოლოდინი არის რა თქმა უნდა, პოზიტიური“,-აღნიშნა პარლამენტის თავმდჯომარემ.

ვენეციის კომისია საკუთარი დასკვნის გასაჯაროებას კვირის ბოლომდე გეგმავს.

მონიკა დავლიენიძე