მსოფლიო

ვპირდები პეტრო პოროშენკოს, რომ ის უკრაინის ციხეში მოხვდება - მიხეილ სააკაშვილი

უკრაინიდან დეპორტირებული მიხეილ სააკაშვილის მტკიცებით, მომხდარის მიუხედავად ის უკრაინელ პოლიტიკოსად რჩება.

„ჩემი მოშორების მცდელობა უბრალოდ განწირულია მარცხისთვის. მე ვრჩები უკრაინელ პოლიტიკოსად, ისევე როგორც ვრჩები ქართველად, და აუცილებლად აღვიდგენ უკრაინის მოქალაქეობას“, -თქვა საქართველოს ექს-პრეზიდენტმა ვარშავაში მიმდინარე პრესკონფერენციაზე.

სააკაშვილის თქმით, დაკავებისას მან ტრავმა მიიღო.

„იცით, გუშინდელის შემდეგ ძალიან მტკივა კისერი, რადგან ისინი [სპეცრაზმელებმა დააკავეს] მთელი გზა მგუდავდნენ. მინდა ვთქვა, რომ უკრაინელ ხალხთან ერთად უკრაინულ ოლიგარქს კისერს მოვტეხ“, - აღნიშნა ოდესის ყოფილმა გუბერნატორმა.

სააკაშვილი დაპირდა პოროშენკოს, რომ მას ციხეში ჩასვამს.

„მე მაქვს შესაბამისი გამოცდილება და ვიცი, როგორ უნდა იმუშაოს ციხეებმა. ამიტომ მე ვპირდები პეტრო პოროშენკოს, იური ლუცენკოს, არსენ ავაკოვსა და რინატ ახმეტოვს, რომ ისინი უკრაინის ციხეებში მოხვდებიან“, - აღნიშნა სააკაშვილმა.

გუშინ სპეცრაზმელთა ჯგუფმა სააკაშვილი კიევში, რესტორან „სულგუნში“ დააკავა. შემდეგ ოდესის ექს-გუბერნატორი კერძო თვითმფრინავით პოლონეთში გადაიყვანეს „რეადმისიასთან“ [არალეგალის იმ ქვეყანაში დაბრუნება, საიდანაც ის არალეგალურად შევიდა სხვა სახელმწიფოში] დაკავშირებული განცხადების მიხედვით, რომელიც პოლონურ მხარეს უკრაინის ეროვნულმა საიმიგრაციო სამსახურმა მიაწოდა.

ანა მებურიშვილი