საზოგადოება
ზაზა ოქუაშვილის მიმართვა სააქციო საზოგადოების შექმნის საინიციატივო ჯგუფს
ბიზნესმენი ზაზა ოქუაშვილი ტელეკომპანია „მე-9 არხთან“ დაკავშირებით სააქციო საზოგადოების შექმნის საინიციატივო ჯგუფს მიმართავს. „მედიანიუსი“ მიმართვის ტექსტს უცვლელად გთავაზობთ:
“ვაფასებ მადლიერებას, რომელიც თქვენი მხრიდან გამოითქვა ჩემს მიმართ, აგრეთვე მადლობელი ვარ ნდობისათვის თქვენი საზოგადოების წევრობასთან დაკავშირებით. ნამდვილად არ შევიზღუდებოდი მხოლოდ გულშემატკივრობით და ვისურვებდი ვყოფილიყავი თქვენი საზოგადოების წევრი, მხოლოდ ამჟამად ჩემი ყურადღება კონცენტრირებული იქნება "იბერიის" ლიცენზიის დაბრუნებაზე, რომლის მაუწყებლობა უკვე 10 წელია ხელოვნურად არის შეჩერებული.
"იბერიის" ლიცენზიის ამჟამინდელი მესაკუთრე არის ტელეკომპანია "იმედის" მფლობელი. დარწმუნებული ვარ, "იბერიის" აღდგენა აუცილებელია საქართველოში ჯანმრთელი მედია სივრცის არსებობისათვის. სასამართლო პროცესი დანიშნულია სექტემბერში.
ვიმედოვნებ, რომ "იბერიის" ლიცენზია დაუბრუნდება მის ნამდვილ მფლობელს, "იბერია ტვ" დაიწყებს მაუწყებლობას და ყველა სხვა ტელეარხთან ერთად მონაწილეობას მიიღებს ქვეყნის დემოკრატიის მშენებლობაში. ვფიქრობ, რომ საზოგადოება ამ პროცესების აქტიური გულშემატკივარი იქნება,” - ნათქვამია მიმართვაში.
შეგახსენებთ, რომ სააქციო საზოგადოების შექმნის საინიციატივო ჯგუფმა ტელეკომპანია „მე-9 არხის“ შესყიდვასთან დაკავშირებით პრემიერ-მინისტრ ბიძინა ივანიშვილს ოფიციალურ განცხადებით მიმართა და შესაბამისი წერილი კანცელარიაში შეიტანა.
რამდენიმე დღის წინ “იბერია ტვ”-ს დამფუძნებლებმა განცხადება გაავრცელეს, რომელშიც ნათქვამი იყო, რომ “იბერია ტვ” გეგმავს მაუწყებლობის აღდგენას და დამფუძნებლები გამოთქვამენ სურვილს და მზადყოფნას, განიხილონ ტელეკომპანია “მე-9 არხის” ჟურნალისტებისა და ტექნიკური რესურსის მიღების შესაძლებლობა. თუმცა შემდგომ, ტელეკომპანია ,,იბერიის“ მფლობელმა ზაზა ოქუაშვილმა ამ საკითხთან დაკავშირებით 24 აგვისტოს ასეთი შინაარსის განცხადება გაავრცელა: "მქონდა სურვილი და გამოვხატე მზადყოფნა, მონაწილეობა მიმეღო "მე-9 არხის” ან მისი ტექნიკური რესურსის მიღებაში, მით უფრო, რომ ძალიან მგრძნობიარე ვარ მედიაბიზნესის მიმართ, რომელიც მქონდა ტელეკომპანია "იბერიის" სახით. მეორე მხრივ, გამოიხატა იგივე სურვილი სააქციო საზოგადოების მიერ. პატივს ვცემ თითოეული მათგანის გულწრფელ სურვილს, რომ უნდათ დამოუკიდებელი და პოლიტიკურად თავისუფალი ტელევიზიის არსებობა, რასაც მეც მივესალმები. სააქციო საზოგადოებაში ახლა უკვე შედის ათასობით ადამიანი. ჩემი მხრივ, არ მიმაჩნია გამართლებულად, რომ ვიყო მათი კონკურენტი. უფრო მეტიც, ვუსურვებ წარმატებებს".