პოლიტიკა
ზაზა ოქუაშვილს `ინტერვიუ` ბიძინა ივანიშვილის რომელიმე გამოსვლამდე ცოტა ხნით ადრე უნდა მიეცა - ნატო ჩხეიძე (ვიდეო)
ტელეკომპანია „იბერიის“ დამფუძნებელი, დეპუტატი ნატო ჩხეიძე დეტალურად საუბრობს იმ ნაბიჯებზე, რომელიც მისი განცხადებით, ხელისუფლებამ ,,იმედის" ეთერში გასაშვები ზაზა ოქუაშვილის ე.წ. დადგმული ინტერვიუს სანაცვლოდ გადადგა.
"ტვ პირველის" ეთერში ჩხეიძემ განაცხადა, რომ სულ რაღაც რამდენიმე საათში მოხდა "ომეგას" საწარმოსთვის აქციზების გადაცემა, რომელსაც მანამდე ისინი სამი თვის განმავლობაში ითხოვდნენ, ასევე "ქართუმ" ჩარიცხა თანხა, სასამართლოში დაიწყო იმ საქმის განხილვა, რომელიც მანამდე რამდენიმე წელი "თაროზე იყო შემოდებული."
ამასთან, ჩხეიძის ინფორმაციით, ,,ომეგა მოტორსში" მივიდა პიროვნება სახელად ზურაბ აბდუშელიშვილი, რომელიც მათ ბიზნესმენად გაეცნო და ერთბაშად 20 ძვირადღირებული ავტომანქანის შეძენის სურვილი გამოთქვა. ნატო ჩხეიძის განცხადებით, 2 მილიონი აღნიშულმა პიროვნებამ იმავე დღეს გადაიხადა, ხოლო დანარჩენის გადახდას კონტრაქტით გათვალისწინებულ ვადებში გეგმავდა.
“ამის შემდეგ, “ომეგა ჯგუფში” მივიდა ბიზნესმენი, ვინმე ზურაბ აბდუშელიშვილი და თქვა, რომ უნდა მანქანების შეძენა. ეს შოურუმი სწორედ ამისთვის არსებობს, თუმცა გასაკვირი ის იყო, რომ ამ ბიზნესმენს სურდა 20 მანქანის შეძენა, თანაც სწრაფად, კონტრაქტიც მაშინვე უნდა ყოფილიყო. ეს უნდა ყოფილიყო ძვირიანი მანქანები, რადგან მის ფირმას ასე სჭირდებოდა. 2 მილიონი მაშინვე მოიტანა ამ ბიზნესმენმა და 5 მილიონიანი კონტრაქტის გაფორმდა, იმ პირობით, რომ დანარჩენი თანხა 2 კვირაში უნდა მოეტანა. შემდეგ პატენტის სასამართლოზეც მიიღეს გადაწყვეტილება. ამის შემდეგ დაგვპირდნენ, რომ მეორე სასამართლოზეც ჩვენთვის სასურველ შედეგს მივიღებდით, თუ ზაზა ოქუაშვილი “იმედს” დაგეგმილ, წინასწარ დაწერილ ინტერვიუს მისცემდა”, – განაცხადა დეპუტატმა და აღნიშნამ, რომ ამ ინფორმაციის შესაბამისი მტკიცებულებებიც გააჩნია.
მისი თქმით, ეს ყველაფერი ხელისუფლების, კონკრეტულად კი ბიძინა ივანიშვილის გადაწყვეტილებით მოხდა. სანაცვლოდ კი ისინი ზაზა ოქუაშვილისგან იმ "ინტერვიუს" ითხოვდნენ, რომელიც ბიზნესმენს "იმედისთვის" უნდა მიეცა და რომლის შინაარსიც მას წინასწარ გადაუგზავნეს.
"შემოთავაზება იყო ასე, რომ ეს ყველაფერი გაგრძელდება, მეორე სასამართლოსაც მოიგებთ, თუკი... და ეს ტექსტი იყო შემოთავაზებული...
ამის შემდეგ ითქვა ასეთი რამ, რომ თუკი არ შესრულდებოდა, რაღა თქმა უნდა ნელ-ნელა ყველაფერი უკან წავიდოდა. მარკებსაც აღარ მოგვცემდნენ, სასამართლოს მეორე ინსტანციასაც წავაგებდით ", - განაცხადა ნატო ჩხეიძემ.
მისივე თქმით, ზაზა ოქუაშვილს "ინტერვიუ" ბიძინა ივანიშვილის რომელიმე გამოსვლამდე ცოტა ხნით ადრე უნდა მიეცა. საუბარია, არჩევნების პირველ ტურამდე ივანიშვილის შეხვედრებზე ჟურნალისტებთან. როგორც ჩხეიძე ამბობს, გათვლილი იყო, რომ ჯერ ოქუაშვილი იტყოდა იმას, რაც წინასწარ დაუწერეს, ხოლო შემდეგ ბიძინა ივანიშვილი ამ ყველაფერს ჟურნალისტებთან განიხილავდა.
"როდესაც ზაზა არ გამოვიდა, იმ ბიზნესმენმა (ზურაბ აბდუშელიშვილი) შემოიტანა თხოვნა თუ მოთხოვნა, რომ მას აღარ უნდა მანქანების შეძენა და ეს თანხა დაუბრუნდეს უკან. ერთი ნაბიჯი უკვე გადაიდგა", - განაცხადა ჩხეიძემ
ამასთან, ჩხეიძე ამ ეტაპზე არ აკონკრეტებს ვინ გადასცა მათ შეთანხმების პირობები და იყო თუ არა ის პიროვნება ხელისუფლების წარმომადგენელი, თუმცა ამბობს, რომ არსებობს შესაბამისი მტკიცებულებები და ამ პიროვნებას აუცილებლად დაასახელებს.