პოლიტიკა

ზაზა სარალიძე დავით ოქიტაშვილის დაკითხვას მოითხოვს

ხორავას ქუჩაზე მოკლული დავით სარალიძის მამამ, ზაზა სარალიძემ დავით ოქიტაშვილის დაკითხვა მოითხოვა. ამის შესახებ სარალიძემ ჟურნალისტებს გენერალურ ინსპექციაში შესვლამდე უთხრა.

საქმე ეხება ოქიტაშვილის პოსტს, რომლის თანახმად, ლევან დადუნაშვილი დავით სარალიძის გამო მოკლეს. სარალიძის თქმით, საჭიროა დადგენა, საიდან ფლობს ოქიტაშვილი ამ ინფორმაციას, მაგრამ თუ ეს დეზინფორმაცია აღმოჩნდა, მან პასუხი უნდა აგოს.

„სოციალურ ქსელში ვრცელდება დავით ოქიტაშვილის პოსტი, რომ თითქოს ლევან დადუნაშვილი მოკლეს ჩემი შვილის გამო. მაინტერესებს, თუ მართლა ჩემი შვილის გამო მოკლეს ეს ადამიანი, ხომ უნდა ვიცოდე სიმართლე? ან საიდან მოიტანა ოქიტაშვილმა ეს? ამის გამო უნდა შევიტანო განაცხადი, რომ დაიკითხოს დავით ოქიტაშვილი.

როდესაც ადამიანი ამბობს, რომ ლევან დადუნაშვილი დავით სარალიძის გამო მოკლეს, ე.ი. ის რაღაც ინფორმაციას ფლობს. თუ არადა, თუ ცრუ ინფორმაციას ავრცელებს, პასუხი უნდა მოეთხოვოს“, - თქვა სარალიძემ.