სამართალი

სიმთვრალით გამოწვეული ჰაერის უკმარისობა - პაატა პავლიაშვილის გარდაცვალების შესახებ ექსპერტიზის დასკვნა ცნობილია

დაკავების დროს პაატა პავლიაშვილის გარდაცვალების მიზეზთან დაკავშირებით ექსპერტიზის პასუხი ცნობილია.

სიმთვრალით გამოწვეული ჰაერის უკმარისობა - ეს არის დასკვნა, რომელსაც ექსპერტები აკეთებენ. ინფორმაციას ამის შესახებ ტელეკომპანია ,,იბერია“ გარდაცვლილის ოჯახზე დაყრდნობით ავრცელებს.

ოჯახის ადვოკატი, ლევან ვეფხვაძე ნუცუბიძის ფერდობზე დაღუპულის მეუღლესთან ერთად ექსპერტიზის პასუხებს პროკურატურაში გაეცნო.

ოჯახი შედეგებს უნდობლობას უცხადებს და ამბობენ, რომ ამით სამართალდამცველების პასუხისმგებლობისგან გათავისუფლებას ცდილობენ.

მათი თქმით, გამოძიებას არ დაუდგენია, რამდენად დროული იყო რეაგირება, როცა გარდაცვლილი დაკავების მომენტში დახმარებას ითხოვდა.

ადვოკატ ლევან ვეფხვაძის ინფორმაციით, ექსპერტიზის დასკვნითვე, გარდაცვლილის სხეულში არ აღმოჩნდა ნარკოტიკული ნივთიერება და ფსიქოტროპული წამლები. ამასთან, გარდაცვლილის სხეულზე არ არის აღმოჩენილი არავითარი ფიზიკური ზეწოლის კვალი.

,,ოჯახმაც გაიგო, რა იყო გარდაცვალების მიზეზი, მაგრამ ეს არ ნიშნავს, რომ ამით გამოირიცხა საპატრულო პოლიციის თანამშრომლების მხრიდან მოვალეობის სავარაუდოდ არაჯეროვანი შესრულება“, - განაცხადა ადვოკატმა.

ცნობისათვის, პაატა პავლიაშვილი 25 ოქტომბერს ნუცუბიძის პლატოზე დაკავებისას შეუძლოდ გახდა და გარდაიცვალა. მისი ოჯახის წევრები მომხდარში იმ პოლიციელებს ადანაშაულებენ, რომლებიც პავლიაშვილს აკავებდნენ.