ე.წ. საბოტაჟის საქმე პოლიტიკური პროცესია, ივანიშვილს ნებისმიერი გადაწყვეტილება მძიმე შედეგებს მოუტანს - ირაკლი კუპრაძე

„ლელო - ძლიერი საქართველოს“ ერთ-ერთმა ლიდერმა, ირაკლი კუპრაძემ ე.წ. საბოტაჟის საქმეზე ბრალდებული რვა პოლიტიკოსის საქმეზე დაკითხულ მოწმეებზე საუბრისას განაცხადა, რომ აღნიშნული საქმე პოლიტიკურად მოტივირებულია და არა სამართლებრივი პროცესი.

მისი თქმით, „ქართული ოცნება“, „ხალხის ძალა“ და „ნეიტრალური საქართველო“ ერთიან ანტიეროვნულ ძალას წარმოადგენენ, ხოლო საქმის ფარგლებში მოწმედ ნანა კაკაბაძის დაკითხვა ხელისუფლების პოლიტიკურ მიზნებზე მიუთითებს.

„ივანიშვილი, „ქართული ოცნება“, „ხალხის ძალა“, „ნეიტრალური საქართველო" - ეს არის ანტიქართული, ანტიეროვნული ძალების ერთი ბანდა, რომელიც დაკავებულია წარმოუდგენელი სიგიჟით.

ივანიშვილმა რა გააკეთა ამის თქმა მოსახლეობისთვის იქნება სრულიად საკმარისი. ნანა კაკაბაძე გამოიყვანა ბიძინა ივანიშვილმა, ნანა კაკაბაძე, პუტჩისტი, ადამიანი, რომელიც თავის დროზე მის ჯგუფთან ერთად ამხილა ზვიად გამსახურდიამ, რომ „სუკ“- ის და რუსეთის აგენტები იყვნენ, ნანა კაკაბაძე, რომელიც მონაწილეობდა სახელმწიფო გადატრიალებაში.

ნანა კაკაბაძე, რომელიც ჯაბა იოსელიანის უახლოესი მეგობარი და თანამებრძოლი იყო დღეს მურუსიძის სასამართლოში ჩივის, რომ თითქოს ოპოზიციონერ პოლიტიკურ ლიდერებს უნდოდათ დაემხოთ ივანიშვილის ხელისუფლება.

ნანა კაკაბაძე, ზვიად გამსახურდიას ხელისუფლების დამამხობელი, წარმოუდგენელი დონის ნაძირალა, რომელიც თავის დროზე ზვიად გამსახურდიამ ამხილა მის დაჯგუფებასთან ერთად „სუკ“-ის და რუსეთის აგენტობაში, ყველა, ვინც წარმოადგენდა ჯაბა იოსელიანს ისინი იყვნენ ზვიადის თქმით, „სუკ“-ის და რუსეთის აგენტები და ეს ხალხი დღეს დევნის ბადრი ჯაფარიძეს, რომელიც თავის დროზე სხვათა შორის ნანა კაკაბაძის ბანდამ, კრიმინალებმა, ჯაბა იოსელიანებმა და კიტოვანებმა დაამხეს 90-იან წლებში. კაცი, რომელიც იყო პირველი მოწვევის პარლამენტის წევრი, დამოუკიდებლობის აქტზე ხელმომწერი და ასე შეუწყდა მას თავის დროზე მანდატი.

სამართლიანი სასამართლო ივანიშვილის და მურუსიძის პირობებში ვერ იარსებებს. ეს არ არის სამართლებრივი პროცესი, ეს არის ცალსახად პოლიტიკური პროცესი.

რაც შეეხება იმას, თუ რა შედეგით დასრულდება ივანიშვილის ეს ცირკი, ამის პროგნოზირება ძალიან რთულია. ჩვენ ველოდებით ციხესაც, ველოდებით სხვა ტიპის გადაწყვეტილებებსაც იმიტომ, რომ ივანიშვილმა ამ არასამართლიანი, უკანონო პოლიტიკური პროცესის დაწყებით ჩიხში შეიყვანა მათ შორის საკუთარი თავი - მიიღებს გადაწყვეტილებას დაკავების შესახებ და ძალიან მძიმე პასუხი დაუბრუნდება დასავლური, განვითარებული დემოკრატიული სამყაროსგან ივანიშვილს. რისიც ყველაზე მეტად ეშინია ეს არის მისი ფულის დაკარგვა. ამ ფულს აუცილებლად დაკარგავს და სანქციები კიდევ უფრო მძაფრი გახდება თუ დაკავების გადაწყვეტილებას მიიღებს, არ დააკავებს და მაშინ მოუწევს ისეთი გზის გამონახვა, რომლიდანაც ასევე მშრალი ვერ გამოძვრება ივანიშვილი“,- განაცხადა ირაკლი კუპრაძემ.