პოლიტიკა
2017 წლის ივნისში წლიურმა ინფლაციამ ყველაზე მაღალ ნიშნულს მიაღწია - საქსტატი
საქართველოს სტატისტიკის ეროვნული სამსახურის მონაცემებით, 2017 წლის ივნისში ინფლაციის დონემ წინა თვესთან შედარებით 0,4%-ით დაიკლო, ხოლო წლიური ინფლაციის დონემ 7,1 % შეადგინა, რაც 2017 წელს ყველაზე მაღალი მაჩვენებელია.
ივნისში ინფლაციის დონეზე იმოქმედა ფასების ცვლილებებმა შემდეგ ჯგუფებზე: 1.5%-ით შემცირდა ფასები სურსათსა და უალკოჰოლო სასმელებზე, რაც ინფლაციის მთლიან მაჩვენებელზე -0,45 პროცენტული პუნქტით აისახა. ასევე ფასები შემცირდა შემდეგ ქვეჯგუფებში: ბოსტნეული და ბაღჩეული (-9 %), რძე, ყველი და კვერცხი (-2,1 %), ზეთი და ცხიმი (-1,1 %) და ხილი და ყურძენი (-0,9 %). 2.5%-ით გაიზარდა ფასები ალკოჰოლურ სასმელებსა და თამბაქოზე, რაც ინფლაციის მთლიან მაჩვენებელში 0,17 პროცენტული პუნქტით აისახა. 1.3%-ით გაიზარდა ფასები ალკოჰოლურ სასმელებზე, ხოლო 3.6%-ით - თამბაქოზე.
რაც შეეხება წლიურ ინფლაციას, მასზე ყველაზე მეტად იმოქმედა ფასების ცვლილებამ სურსათისა და უალკოჰოლო სასმელების ჯგუფში, რომლის ფასები 9.5%-ით გაიზარდა, რაც 2,87 პროცენტული პუნქტით აისახა მთლიანი ინდექსის ზრდაში. ფასები 15,3 %-ით მომატებულია ტრანსპორტის სფეროში, რაც წლიურ ინფლაციაზე 1,92 პროცენტული პუნქტით აისახა. ალკოჰოლურ სასმელებსა და თამბაქოზე ფასები 18.2%-ით გაიზარდა, რაც 1,18 პროცენტული პუნქტით აისახა მთლიანი ინდექსის ზრდაში. 7.4%-ით გაიზარდა ფასები ჯანმრტელობის დაცვაზე, რაც 0,66 პროცენტული პუნქტით აისახა მთლიანი ინდექსის ზრდაში.