კომენტარი

ამ 6 წლის განმავლობაში ივანიშვილის ყველაზე დიდი ტყუილი ის იყო, რომ თურმე დაფიქრდა პრეზიდენტის პოსტის ოპოზიციისთვის დათმობაზე - რომან გოცირიძე

ყველაზე დიდი ტყუილი, რაც ბიძინა ივანიშვილს ამ დრომდე უთქვამს ის იყო, რომ თურმე დაფიქრდა პრეზიდენტის პოსტის ოპოზიციისთვის დათმობაზე, - განაცხადა ფრაქცია "ნაციონალური მოძრაობის" თავმჯდომარემ, რომან გოცირიძემ ექს-პრემიერ ბიძინა ივანიშვილის ინტერვიუს კომენტირებისას.

"ისტორიკოსები და განსაკუთრებით ბიძინოლოგები, რომლებიც ალბათ, შეისწავლიან მის ყველაზე დიდ ტყუილს, იტყვიან, რომ ამ 6 წლის განმავლობაში ყველაზე დიდი ტყუილი ის კი არ იყო, რომ ყველას ექნებოდა უფასო ფული, ან დაბალპროტენციანი კრედიტები და ა.შ., არამედ ის, რომ თურმე დაფიქრდა პრეზიდენტის პოსტის ოპოზიციისთვის დათმობაზე. ეს არის წარმოუდგენელი. ეს არის ტყუილი და არ მოხდება არასდროს. მთელი ინტერვიუს განმავლობაში შეცდომების აღიარების ირგვლივ იგრძნობოდა ერთადერთი გზავნილი - თურმე 6 წლის განმავლობაში ქვეყანა ინგრეოდა, სიღარიბემ მოიმატა და ყველაფერში დამნაშავე არის გიორგი კვირიკაშვილი", - განაცხადა რომან გოცირიძემ.

რაც შეეხება ივანიშვილის განცხადებას იმის შესახებ, რომ ორმა ბანკმა შეჭამა ქვეყანა, რომან გოცირიძე მიიჩნევს, რომ ეს განცხადება არის საშიში.

"მისი განცხადება ბანკებთან დაკავშირებით არის ძალიან სახიფათო, ძალიან მავნე და ამან შეიძლება მთლიანად მოშალოს ქვეყნის ეკონომიკა. ცეცხლს ეთამაშება ბიძინა ივანიშვილი. თუ მას უნდა "ქართუ" და "ლიბერთი ბანკები" გააერთიანოს და მოუგოს "თიბისი ბანკს", მაშინ გავიდეს ლონდონის საფონდო ბირჟაზე და ჰქონდეს ისეთივე ხარისხი, როგორიც მათ აქვთ. კეთილი ინებოს და შეწყვიტოს პოლიტიკური თუ ეკონომიკური ინტერესებით ქვეყნის ეკონომიკური საფუძვლების მოშლა", - აღნიშნა რომან გოცირიძემ.