პოლიტიკა
არასამთავრობო ორგანიზაციებმა საკმაოდ დამაფიქრებელი არგუმენტები მოგვახსენეს - ანა დოლიძე
საქართველოს პრეზიდენტის საპარლამენტო წარმომადგენელმა, ანა დოლიძემ „ადგილობრივი თვითმმართველობის კოდექსის“ შესახებ არასამთავრობო ორგანიზაციებთან გამართულ შეხვედრაზე ისაუბრა.
დოლიძემ მესამე სექტორზე დაყრდნობით აღნიშნა, რომ 7 ქალაქისთვის თვითმმართველის სტატუსის ჩამორთმევა ადგილობრივი მოსახლეობის ჩართულობის გარეშე მოხდა. არასამთავრობო ორგანიზაციებმა ასევე ისაუბრეს შეტანილი საკანონმდებლო ცვლილებების შინაარსობრივ პრობლემებზე.
„არასამთავრობო ორგანიზაციებმა საკმაოდ დამაფიქრებელი არგუმენტები მოგვახსენეს. საყურადღებოა, რომ შვიდი თვითმმართველი ქალაქის გაუქმება ადგილობრივი არჩევნების წელს ხდება. როგორც არასამთავრობო ორგანიზაციები ამბობენ, იყო დარღვევები ხალხთან კომუნიკაციის კუთხით. შესაბამისი ჩართულობა ამ ქალაქების მაცხოვრებლებისა არ ყოფილა. ამავე დროს, როგორც არასამთავრობო ორგანიზაციები ამბობენ, პარლამენტის მიერ მიღებულ დოკუმენტში სერიოზული შინაარსობრივი პრობლემებია. ჩვენ მათ დიდი გულისყურით მოვისმენთ, რადგან ეს ის ხალხია, ვინც აღნიშნული საკითხი ძალიან კარგად იცის“, - განაცხადა დოლიძემ შეხვედრის დასრულების შემდეგ.
ანა დოლიძისთან ერთად არასამთავრობო ორგანიზაციებს პრეზიდენტის მრჩეველი ფიქრია ჩიხრაძე შეხვდა.
მესამე სექტორი ითხოვს პრეზიდენტისგან, რომ მან ვეტო დაადოს ადგილობრივი თვითმმართველობების შესახებ საქართველოს კანონპროექტში მიღებულ ცვლილებებს და მოტივირებული შენიშვნებით პარლამენტს დაუბრუნოს. ცვლილებების მიხედვით, 14 მუნიციპალიტეტი 7 მუნიციპალიტეტად ერთიანდება, ხოლო 7 ქალაქს თვითმმართველის სტატუსი ჩამოერთმევა.