საზოგადოება

არასამთავრობოები თბილისის მთავრობისგან მოითხოვენ, რომ მან დიღმის ტყე-პარკში მშენებლობის ნებართვა არ გასცეს და ადგილი ლანდშაფტურ-რეკრეაციულ ზონად გამოაცხადოს

არასამთავრობო ორგანიზაციებმა მოითხოვეს თბილისის მერიისგან და საკრებულოსგან, დიღმის ტყე-პარკის ტერიტორიაზე მორიგი მშენებლობის ნებართვა არ გასცენ. ასე მესამე სექტორი შეუერთდა მოსახლეობის ანალოგიურ მოთხოვნას, რომელზეც ხელმოწერები უკვე შეგროვდა.

გარდა ამისა, არასამთავრობოებმა მოითხოვეს, რომ დიღმის ტყე-პარკის ლანდშაფტურ-რეკრეაციულ ზონად გამოცხადდეს. აღნიშნულთან დაკავშირებით მათ განცხადებაც გაავრცელეს, რომელსაც 9 არასამთავრობო ორგანიზაციის წარმომადგენელი აწერს ხელს, კერძოდ, „კავკასიური სახლი“, „ახალგაზრდა იურისტთა ასოციაცია“, „მწვანე ალტერნატივა“, „ადამიანის უფლებათა ცენტრი“, „ადამიანის უფლებების სწავლებისა და მონიტორინგის ცენტრი“, ფონდი „ღია საზოგადოება საქართველო“, „ინიციატივა საჯარო სივრცისთვის“, „CENN“ და „უსაფრთხო სივრცე“.

ფონდი „ღია საზოგადოება - საქართველოს“ დირექტორის ქეთი ხუციშვილის განცხადებით, დიღმის მოსახლეობა და აქტივისტები დიღმის ტყე-პარკის გადასარჩენად 15 წელია იბრძვიან. მისი თქმით, დღეს კი ახალი პრობლემა დგება - შესაძლოა, კომპანია „ანაგმა“ იქ მრავალფუნქციური კომპლექსის მშენებლობა დაიწყოს, რომელიც სამომავლოდ დიღმის ტყე-პარკს დააზიანებს.

„ახალი კომპლექსი მხოლოდ ორანჟერია არ იქნება. ეს იქნება ასევე სადღესასწაულო ცენტრი, საკონფერენციო დარბაზი და ბევრი სხვა რამ და თუ ეს მშენებლობა დაიწყო, ბევრი სხვა გაჩერებული მშენებლობაც შეიძლება აღდგეს. საბოლოოდ კი ძალიან დიდი ზიანი მიადგება პარკს. მხოლოდ ორანჟერიის წინააღმდეგი არავინ არ იქნებოდა, თუმცა გასაოცარია, რა საჭიროა ხელოვნური ორანჟერია, სადაც არის ბუნებრივი პარკი და დასასვენებელი ადგილი“, - განაცხადა ხუციშვილმა.

ივნისში ქალაქის არქიტექტურის სამსახურმა კომპანია „ანაგს“ ის სამშენებლო პირობები განუსაზღვრა, რომლის თანახმადაც ტერიტორიაზე მრავალფუნქციური კომპლექსი უნდა აშენდეს.