რეგიონები
ასამდე მუშამ ბეჟათუბნის სარკინიგზო ხაზისა და გვირაბის მშენებლობა შეაჩერა - დასაქმებული სიცოცხლისთვის უსაფრთხო გარემოს არარსებობას უჩივიან
ხარაგაულში, ბეჟათუბნის სარკინიგზო ხაზისა და გვირაბის მშენებლობაზე დასაქმებული ასამდე მუშა გაიფიცა. ამის შესახებ ინფორმაცია „საქართველოს რკინიგზელთა ახალმა პროფესიულმა კავშირმა“ გაავრცელა.
პროფკავშირების განცხადებით, გაფიცულები უსაფრთხო სამუშაო გარემოს უზრუნველყოფას ითხოვენ.
„ბეჟათუბანში (ხარაგაულის მუნიციპალიტეტი) კომპანია „ჩინეთის რკინიგზის 23-ე ბიუროში“ დასაქმებულმა ასამდე მუშამ, სარკინიგზო ხაზისა და გვირაბის მშენებლობა შეაჩერა!
დასაქმებულები კომპანიაში შრომითი პირობების უხეშ დარღვევასა და სიცოცხლისთვის უსაფრთხო გარემოს არარსებობას უჩივიან.
არსებულ პრობლემებთან დაკავშირებით, პროფკავშირსა და კომპანიის ადმინისტრაციას შორის, წლების განმავლობაში შედგა არაერთი მოპალარაკება და გაფორმებულია ყველა დონის ორმხრივი ხელშეკრულება, რის საფუძველზეც „ჩინეთის რკინიგზის 23-ე ბიუროს“ წარმომადგენლობას საქართველოში, შესარულებლად აღებული აქვს რიგი ვალდებულებები.
„რკინიგზელთა ახალი პროფესიული კავშირის“ მხრიდან, 2017 წლის ოქტომბრის თვეში განხორციელებული ინსპექტირებისა და მონიტორინგის შედეგად, გამოვლინდა აღებული ვალდებულებების შეუსრულებლობის არაერთი ფაქტი და ხაზი გაესვა შრომის კოდექსის უხეშ დარღვევებს, რის შემდეგაც, კომპანიის მენეჯმენტმაც შესაბამისი რეკომენდაციები მიიღო.
ადგილობრივი დასაქმებულების მხრიდან მიღებული გადაწყვეტილება, რის შედეგადაც სამუშაო პროცესი შეჩერდა, ვფიქრობთ, უკავშირდება დამსაქმებლის მხრიდან აღებული ვალდებულებების ნაწილობრივ შეუსრულებლობას, გამომდინარე აქედან მოუწოდებს სს „საქართველოს რკინიგზასა“ და ააიპ „ჩინეთის რკინიგზის 23-ე ბიუროს“ წარმომადგენლობას საქართველოში, დროულად იყოს უზრუნველყოფილი მოლაპარაკებების დასაწყებად საჭირო გარემო“, - წერია „საქართველოს რკინიგზელთა ახალი პროფესიული კავშირის“ ფეისბუკგვერდზე გამოქვეყნებულ განცხადებაში.