პოლიტიკა

აუდიტის სამსახური საპრეზიდენტო არჩევნებში მონაწილეობის ყველა მსურველს წინასაარჩევნო პერიოდში განხორციელებული ხარჯების დეკლარირებისკენ მოუწოდებს

სახელმწიფო აუდიტის სამსახური 2018 წლის საპრეზიდენტო არჩევნებში მონაწილეობის მსურველ ყველა პოლიტიკურ პარტიასა და დამოუკიდებელ კანდიდატს მოუწოდებს, არჩევნების წინსაარჩევნი კამპანიის გამჭვირვალედ წარმართვის მიზნით, დროულად დაიწყონ საარჩევნო მიზნებისთვის განხორციელებული ხარჯების დეკლარირება საარჩევნო კანონმდებლობითა და გენერალური აუდიტორის 2016 წლის 5 მაისის ბრძანებით დადგენილი წესით.

“მოვუწოდებთ ყველა სუბიექტს, ვისაც აქვს სურვილი მონაწილეობა მიიღოს 2018 წლის არჩევნებში, ცესკოში რეგისტრაციის გავლამდე დაექვემდებაროს პოლიტიკური პარტიებისთვის და დამოუკიდებელი კანდიდატებისთვის კანონმდებლობით დადგენილ წესებს და დარეგისტრირდეს სახელმწიფო აუდიტის სამსახურში, რათა მივაღწიოთ პოლიტიკური ფინანსების მაქსიმალური გამჭვირვალობის სტანდარტს და სამართლიანი საარჩევნო გარემოს ფორმირებას.

სახელმწიფო აუდიტის სამსახურის პოლიტიკური ფინანსების მონიტორინგის დეპარტამენტი აცხადებს მზადყოფნას ნებისმიერი სახის დამატებითი კონსულტაციებისა და ტრეინინგების ჩასატარებლად, რათა თანასწორობის პრინციპებიდან გამომდინარე უზრუნველყოფილი იყოს გამჭვირვალე და სამართლიანი საარჩევნო პროცესის წარმართვა, საქართველოს მოქმედი კანონმდებლობის შესაბამისად, - წერია აუდიტის სამსახურის განცხადებაში.