რეგიონები

ბათუმის საერთაშორისო აეროპორტის განვითარებასთან დაკავშირებით, ტექნიკურ-ეკონომიკური კვლევა ჩატარდება

ეკონომიკისა და მდგრადი განვითარების სამინისტროს „საქართველოს აეროპორტების გაერთიანება“ ბათუმის საერთაშორისო აეროპორტის 10 წლიან განვითარებასთან დაკავშირებით ტექნიკურ-ეკონომიკურ კვლევას ჩაატარებს. კვლევის მიხედვით, ბათუმის საერთაშორისო აეროპორტის ინფრასტრუქტურა დეტალურად შეისწავლება, რათა შემუშავდეს მოკლევადიანი და გრძელვადიანი განვითარების გეგმები.

როგორც „მედიანიუსს“ „საქართველოს აეროპორტების გაერთიანებიდან“ აცნობეს, „საქართველოს აეროპორტების გაერთიანებას“ საკონსულტაციო მომსახურებას საერთაშორისო საკონსულტაციო კომპანია „TH Airport Consulting“ გაუწევს. დოკუმენტს დღეს ხელი მოაწერეს „საქართველოს აეროპორტების გაერთიანების“ დირექტორმა გიორგი ჩოგოვაძემ და TH Airport Consulting დირექტორმა ტორსტენ ჰენტჩელმა, რომელიც ამავე დროს ბათუმის აეროპორტის განვითარების ტექნიკურ-ეკონომიკური კვლევის ხელმძღვანელი იქნება.

„ხელშეკრულება, რომელიც გაფორმდა ეკონომიკისა და მდგრადი განვითარების სამინისტროს „საქართველოს აეროპორტების გაერთიანებასა“ და გერმანულ საკონსულტაციო კომპანიას შორის, გულისხმობს ბათუმის საერთაშორისო აეროპორტზე წინასწარი ტექნიკურ-ეკონომიკური კვლევის ჩატარებას. რის შემდეგაც ჩვენ დავინახავთ, თუ როგორ უნდა განვითარდეს 10 წლის ჭრილში ალექსანდრე ქართველის სახელობის აეროპორტი, მათ შორის გამტარუნარიანობის ნაწილშიც,” - განაცხადა გიორგი ჩოგოვაძემ.

მომსახურების ფარგლებში აეროპორტის არსებული გამტარუნარიანობა შეფასდება და მოხდება ანალიზი, ასევე შეისწავლება მისი ინფრასტრუქტურისა და აეროპორტის გაფართოების შესაძლებლობის საკითხი.