პოლიტიკა
ბესიკ ბუგიანიშვილმა ამ განაჩენით სასამართლოს ჩაადენინა თვითმკვლელობა - მეუფე პეტრე
ჭყონდიდელი მიტროპოლიტის, მეუფე პეტრეს შეფასებით, ე.წ. ციანიდის საქმეზე გამოტანილი განაჩენით ქართულმა სასამართლომ თავი მოიკლა. ამის შესახებ მან „რუსთავი 2“-ის ეთერში ჩართვისას განაცხადა.
„დღევანდელი სასამართლო და ამ სასამართლო პროცესში მონაწილე საერო და სასულიერო პირები არიან პირდაპირი მემკვიდრეები პილატეს სასამართლოსი, რომელმაც უფალ იესო ქრისტეს გამოუტანა უსამართლო ფარისევლური განაჩენი და მე ვფიქრობ და ჩემი პირადი შეფასებით, როგორც მოსამართლემ, მის მთელ თაობასა და შთამომავლობას, ასევე სასამართლოს ჩაადენინა სუიციდი ანუ თვითმკვლელობა, რომელიც მიუტევებელი და ძალიან მძიმე ცოდვაა.
მინდა შევახსენო, რომ მათ, საუბედუროდ, დაავიწყდათ, რომ ბოლო სიტყვას უფალი ამბობს ჩვენს ცხოვრებაში და მათ დაავიწყდათ, რომ მსაჯული არის ქრისტე ღმერთი თითოეული ჩვენგანის ცხოვრებაში“, - თქვა მიტროპოლიტმა.
მეუფე პეტრემ განაჩენი „ანტისახელმწიფოებრივი“ უწოდა.
„ეს არის სასამართლოს თვითმკვლელობა, ეს არის ანტისახელმწიფოებრივი გადაწყვეტილება, რამე თუ სახელმწიფოს თავისუფლება, ძლიერება, მისი განვითარება დამოუკიდებელ, თავისუფალ სასამრთლოზე გადის, ვინაიდან სასამართლო და მოსამართლე დარჩა ზეწოლისა და ქვეყანაში გაბატონებული უსამართლობის მონად, რა თქმა უნდა, ეს არის ანტისახელმწიფოებრივი გადაწყვეტილება“, -თქვა მეუფემ.
ჭყონდიდელი მიტროპოლიტის თქმით, მმართველი გუნდის ქმედებები იყო მიმართული დეკანოზის წინააღმდეგ
„ჩვენ დღემდე არ მოგვისმენია და სახელმწიფოს პირველი პირების სინანული არ გვინახავს, რომლებიც უპრინციპოდ სდებდნენ ბრალს, დაარღვიეს უდანაშაულობის პრეზუმფცია და ცილი დასწამეს მამაოს დაკავებისთანავე და მათ არანაირი ნაბიჯი არ გადაუდგამთ ამ ცოდვის გამოსასყიდად”, - აღნიშნა მეუფე პეტრემ.
შეგახსენებთ, დეკანოზ გიორგი მამალაძეს მოსამართლე ბესიკ ბუგიანიშვილმა 9-წლიანი პატიმრობა მიუსაჯა.
თავიდან მამალაძეს ბრალად ედებოდა დამამძიმებელ გარემოებაში განზრახ მკვლელობის მომზადება ( სისხლის სამართლის კოდექსის 109-ე მუხლი), რაც 16-დან 20 წლამდე პატიმრობას ითვალისწინებს, თუმცა მოსამართლემ ბრალდება გადაუკვალიფიცირა - მას უკვე მკვლელობის მომზადებისთვის (სსკ-ის 108-ე მუხლი) შეეფარდა 9-წლიანი პატიმრობა. დეკანოზი დამნაშავედ ცნეს ცეცხლსასროლი იარაღის უკანონოდ შეძენა-შენახვაში.
განაჩენის გამოცხადების პროცესს თავად მამალაძე არ დასწრებია.
ანა მებურიშვილი