საზოგადოება

ბინაში, სადაც ცოლ-ქმარი დაიღუპა, ღია წვის კამერიანი წყლის გამაცხელებელი იყო, რისი მოხმარებაც სახლში კატეგორიულად აკრძალულია - „ყაზტრანსგაზ - თბილისი“

„ყაზტრანსგაზ - თბილისი“ წუხელ, პეკინის გამზირის 14 ბ-ში მდებარე ერთ-ერთ საცხოვრებელ ბინაში ორი ადამიანის გარდაცვალებასთან დაკავშირებით ინფორმაციას ავრცელებს.

როგორც კომპანიაში აცხადებენ, „ყაზტრანსგაზ - თბილისის“ სპეციალისტებმა ადგილზე დათვალიერების შემდეგ აღმოაჩინეს ღია წვის კამერიანი წყლის გამაცხელებელი, რისი მოხმარებაც სახლში კატეგორიულად აკრძალული და საშიშია.

„ყაზტრანსგაზ - თბილისის“ თანამშრომლები გაზგაყვანილობის გეგმური შემოწმების მიზნით აღნიშნულ მისამართზე რამდენიმეჯერ იმყოფებოდნენ, თუმცა არაერთი მცდელობის მიუხედავად, ბინის შემოწმება ვერ მოხერხდა, რადგან კარი არავინ გააღო.

გასული წლის ოქტომბრის თვიდან „ყაზტრანსგაზ - თბილისმა“ სოციალური კამპანია „ მეტი უსაფრთხოებისთვის“ დაიწყო. ამ კამპანიის ფარგლებში სხვადასხვა მედია საშუალებებით, არაერთგზის გავაფრთხილეთ მომხმარებლები, რომ ღია კამერიანი გაზის გამაცხელებლები და გამათბობლები სახიფათოა თქვენი სიცოცხლისათვის. აგრეთვე არაერთგზის ვთხოვეთ მომხმარებლებს, რომ დარეკონ კომპანიის ცხელ ხაზზე (114) და მოითხოვონ ნაქირავები ან დაგირავებული ბინების შემოწმება, რადგან უბედური შემთხვევების უმეტესობა სწორედ ასეთ ბინებზე მოდის. აღნიშნული ტრაგედიაც სწორედ ნაქირავებ ბინაში მოხდა.

კომპანია „ყაზტრანსგაზ - თბილისი“ უმორჩილესად გთხოვთ, გაუფრთხილდით თქვენი და თქვენი ოჯახის წევრების სიცოცხლეს. უარი თქვით ღია კამერიან დანადგარებზე და გაითვალისწინეთ ჩვენი სპეციალისტების რჩევები“, - ნათქვამია კომპანიის მიერ გავრცელებულ ინფორმაციაში.