უახლესი ამბები
- 17.04.2024 15:51სხვადასხვა ოლიგარქებზე გაფორმებული მთელი რუსული შავი სალარო შესაძლოა ვიხილოთ საქართველოში - გია ხუხაშვილი `ოცნების` ახალ კანონპროექტზე
- 17.04.2024 15:40პარლამენტმა, პირველი მოსმენით, 82 ხმით მხარი დაუჭირა “საგადასახადო კოდექსში“ ცვლილებებს
- 17.04.2024 14:54ამ პირობებში პარლამენტში ყოფნას ჩემთვის არც პოლიტიკური აზრი და არც მორალური გამართლება გააჩნია - გრიგოლ ვაშაძე
არქივი
სამართალი
„ბირჟა მაფიის“ წევრ გიორგი ქებურიას წინააღმდეგ სისხლისსამართლებრივი დევნა შეწყდა
თბილისის პროკურატურამ „ბირჟა მაფიის“ წევრის, გიორგი ქებურიას წინააღმდეგ სისხლისსამართლებრივი დევნა შეწყვიტა. ამის შესახებ პრესკონფერენციაზე რეპერის ადვოკატმა გაგი მოსიაშვილმა განაცხადა.
მოსიაშვილის განმარტებით, გამოძიებამ დაადასტურა გიორგი ქებურიას ჩვენების სისწორე, რითიც დამტკიცდა მისი უდანაშაულობა. ამის გამო გიორგი ქებურიას მიმართ სისხლის სამართლის საქმე შეწყდა.
„მეექვსე თვეა დაწყებული, რაც გამოძიება მიმდინარეობდა ქალაქ თბილისის პროკურატურაში. დაცვის მხარემ მოვიპოვეთ ის ინფორმაცია, რომელიც გიორგი ქებურიას მიერ მიცემულ ჩვენებას ეხებოდა. გიორგი ქებურია დაკავებული იყო ყაზბეგის ქუჩაზე. ამოვიღეთ ვიდეოები სასამართლოს განჩინებით, რომლითაც დასტურდებოდა მისი უდანაშაულობა. მინდა პროკურატურას მალდობა გადავუხადო, დადგინდა ქებურიას უდანაშუალობა, რის გამოც შეწყდა საქმის წარმოება მის მიმართ. ეს არის კლასიკური მაგალითი, როგორ უნდა მოიქცეს ზედამხედველი პროკურორი, როდესაც დანაშაული არ დასტურდება. იმედი მაქვს, ნებისმიერ შემთხვევაში შეინარჩუნებს ობიექტურობას პროკურატურა. რაც შეეხება პოლიციელების მხრიდან შესაძლო დანაშაულის ჩადენას გიორგი ქებურიას მიმართ, იმედი მაქვს, პროცესები ობიექტურად წარიმართება“, - თქვა ადვოკატმა.
ადვოკატის თქმით, ქებურიას წინააღმდეგ წარმოებული საქმის პარალელურად დაიწყო გამოძიება ცალკეული პოლიციელების მიმართ ჰიპ-ჰოპ არტისტის საჩივრის საფუძველზე. მოსიაშვილმა აღნიშნა, რომ გამოძიება ამაზე გრძელდება.
გიორგი ქებურია ჯგუფის კიდევ ერთ წევრთან, რეპერ მიშკა მგალობლიშვილთან ერთად, 8 ივნისს დააკავეს კლიპი „თესლი შავი ზედას“ გამოქვეყნების შემდეგ, სადაც პოლიციელი იყო გაშარჟებული.
პროკურატურა ქებურიას 2,3342 გრამი MDMA-ის შეძენა-შენახვას ედავებოდა. გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე მიმდინარეობდა. ბრალის დამტკიცების შემთხვევაში "ბიჟა მაფიის" წევრებს 8-დან 20 წლამდე ან უვადო თავისუფლების აღკვეთა ემუქრებოდათ.
სასამართლომ მიხეილ მგალობლიშვილს გირაო 50 ათასი ლარის, გიორგი ქებურიას კი 20 ათასი ლარის ოდენობით შეუფარდა.
ანა მებურიშვილი