კომენტარი

ბიზნესმენებთან მიდის კომუნიკაცია, რომ სალომე ზურაბიშვილის საარჩევნო ფონდი შეავსონ - გიორგი ვაშაძე

ბიზნესმენებთან მიდის ახლა კომუნიკაცია და დავალებები, რომ სალომე ზურაბიშვილის საარჩევნო ფონდი შეავსონ, - განაცხადა გაერთიანებული ოპოზიციის „ძალა ერთობაშია“ საარჩევნო შტაბის ხელმძღვანელმა გიორგი ვაშაძემ.

მისი თქმით, „ქართული ოცნება“ სახის შენარჩუნებას ცდილობს.

„თქვენ ნახავთ, რომ ცოტა ხანში მთელ საქართველოში ბიზნესს „შეუყვარდება“ სალომე ზურაბიშვილი. იტყვიან, რომ ეს არის ის ადამიანი, რომელიც უნდა იყოს საქართველოს პრეზიდენტი. მიუხედავად იმისა, რომ პირველ რიგში, სწორედ ბიზნესსექტორი გრძნობს და ხედავს იმას, რომ ასეთი პრეზიდენტი ქვეყანას არ შეიძლება ჰყავდეს.

„ქართული ოცნება“ არის უკიდურესად რთულ მდგომარეობაში, მას გასული არჩევნების შემდეგ, ფაქტობრივად გაუმესამედდა რეიტინგი, აქედან გამომდინარე, სახის შენარჩუნებას ცდილობენ ამ საპრეზიდენტო არჩევნებში. როდესაც სალომე ზურაბიშვილი წააგებს, იტყვიან, რომ ეს მათი კანდიდატი არ იყო, თუმცა, ამ „ბლეფს“ საზოგადოება არ დაიჯერებს“, - განაცხადა ვაშაძემ.