მსოფლიო
ჩემი შვილი რომ წავა არჩევნებზე კანდიდატების სიაში ისევ პუტინი იქნება - ტელეწამყვანი ქსენია სობჩაკი რუსეთის პრეზიდენტობისთვის იბრძოლებს
რუსმა ტელეწამყვანმა ქსენია სობჩაკმა 2018 წლის რუსეთის საპრეზიდენტო არჩევნებში მონაწილეობის მიღება გადაწყვიტა. ამავდროულად სპეციალურად არჩევნებისთვის ინტერნეტში ამუშავდა საიტი სახელწოდებით „სობჩაკი ყველას წინააღმდეგ“, იუწყება ბიბისის რუსული სამსახური.
„როცა 18 წლის ვიყავი, პუტინი რუსეთის პრეზიდენტი გახდა. ბავშვები, რომლებიც იმ წელს დაიბადნენ, ახლა თვითონაც წავლენ ხმის მისაცემად. არადა, შეიძლება ისიც მოხდეს, რომ როცა ჩემი ვაჟი წავა არჩევნებზე, კანდიდატების სიაში ისევ იქნებიან ზიუგანოვი, ჟირინოვსკი და პუტინი“, -განაცხადა სობჩაკმა.
რუსეთის პრეზიდენტის პრესმდივნის, დიმიტრი პესკოვის თქმით, სობჩაკი ყველა კრიტერიუმს აკმაყოფილებს, რათა საკუთარი კანდიდატურა წარადგინოს საპრეზიდენტო არჩევნებზე. მან აღნიშნა, რომ პუტინთან ტელეწამყვანს თავისი გადაწყვეტილება არ შეუთანხმებია.
იგივე დაადასტურა სობჩაკმაც. ტელეკომპანია „Дождь"-ის ეთერში მან განაცხადა, რომ პუტინს შეხვდა. სობჩაკის ვარაუდით, რუსეთის პრეზიდენტის რეაქცია უარყოფითი იყო.
„მომეჩვენა, თუმცა ისე კარგად არ ვიცი პრეზიდენტის რეაქციები, რომ მას არ მოეწონა“, - თქვა სობჩაკმა და აღნიშნა, რომ პუტინს რამე კონკრეტული შეფასება არ მიუცია მისი გადაწყვეტილებისთვის.
შეგახსენებთ, პუტინის მთავარ ოპონენტს, ალექსეი ნავალნის, რუსულმა ცენტრალურმა საარჩევნო კომისიამ უარი უთხრა რეგისტრაციაზე იმ საბაბით, რომ ის ნასამართლევია. თვითონ რუსი ოპოზიციონერი ამ ფორმულირებას არ ეთანხმება. მისი თქმით, რუსეთის კონსტიტუცია საპრეზიდენტო არჩევნებზე მონაწილეობას უფლებას აძლევს, ხოლო მის წინააღმდეგ წარმოებულ სისხლის სამართლებრივ დევნას პოლიტიკურად მოტივირებულს უწოდებს.
ტელეწამყვანი ამ ამბავს გამოეხმაურა. ტელეწამყვანის განცხადებით, თუ ნავალნის დაარეგისტრირებენ, სობჩაკი კანდიდატურას მოხსნის მის სასარგებლოდ.
ტელეწამყვანი ცნობილი საბჭოთა და რუსი დეპუტატის, ანატოლი სობჩაკის შვილია. მამამისი სანქტ-პეტერბურგის მერი იყო 1991-1996 წლებში, ხოლო მისი ერთ-ერთი მოადგილე რუსეთის ამჟამინდელი პრეზიდენტი, ვლადიმერ პუტინი იყო.
ქსენია სობჩაკმა თავისი ტელეკარიერა სკანდალური რეალიტი-შოუებით დაიწყო. ის ხშირად იყო ბულვარული ქრონიკის გმირიც. ბოლო წლებში რუსეთის საპრეზიდენტო არჩევნების კანდიდატმა აქტუალურ პოლიტიკურ თემებზე გადავიდა. ის ასევე შედიოდა რუსული ოპოზიციის საკოორდინაციო საბჭოში.
ანა მებურიშვილი