რეგიონები
ჭიათურაში პროფკავშირები და მაღაროელები აქციას მართავენ
ჭიათურის ცენტრში მაღაროს მუშები ტრაფარეტებითა და ლოზუნგებით მსვლელობას მართავენ. ისინი ხელფასის მომატებას და კოლექტიური ხელშეკრულების გაფორმებას მოითხოვენ, სადაც შრომის უსაფრთხოების საკითხებიც უნდა აისახოს.
აქციის გამართვა პროფკავშირებსა და მაღაროელებს რამდენიმე დღით ადრე ჰქონდათ დაგეგმილი, რასაც დამატებითი მუხტი საწარმოში კიდევ ერთი მუშის გარდაცვალებამ მისცა.
საწარმოს ადმინსტრაციამ გუშინ აქციის გადადება ითხოვა და მოლაპარაკებების, ასევე პრობლემატური საკითხების გადაჭრის მზადყოფნა გამოთქვა.
დასაქმებულებთან შეხვედრის სურვილი „ჯორჯიან მანგანეზის“ სპეციალურმა მმართველმა ნიკა ჩიქოვანმა გამოთქვა, რის გამოც პროფკავშირებმა რამდენიმე დღით ადრე დაგეგმილი აქციის გამართვას მოლაპარაკებათა მაგიდასთან დასხდომა არჩიეს.
თუმცა როგორც საქართველოს პროფესიული კავშირების გაერთიანებაში აცხადებენ, დღეს დილით საწარმოს ადმინისტრაციის მიერ გაკეთებული ოფიციალური განმარტებით "ჯორჯიან მანგანეზის" სპეციალური მმართველის ნიკა ჩიქოვანის შეუძლოდ ყოფნის გამო ვერ შედგება.
,,დასაქმებულების და პროფკავშირების მიერ დღეს, უკვე სპონტანურად დაგეგმილ აქციაზე გაჟღერებული მოთხოვნები, შეუსრულებლობის შემთხვევაში, აუცილებლად იქცევა შრომითი დავის დაწყების მიზეზად“, - აცხადებენ პროფკავშირებში.