საზოგადოება

ჩვენ ერთიან საქართველოში ვიცხოვრებთ - გიორგი კვირიკაშვილი

საქართველოს პრემიერ-მინისტრის, გიორგი კვირიკაშვილის განცხადებით, ხელისუფლება მუშაობს ოკუპირებული ტერიტორიების დასაბრუნებლად.

ამის შესახებ მან მუხათგვერდის ძმათა სასაფლაოზე თქვა, სადაც მთავრობის წევრებთან ერთად პატივი მიაგო აგვისტოს ომში დაღუპულთა ხსოვნას.

„მთელ საქართველოს გულში უნთია მათი ხსოვნის სანთელი. რაც შეეხება ომის შედეგებს, ჩვენ ვმუშაობთ, რომ მაქსიმალური ძალისხმევა დავხარჯოთ, რათა ჩვენი ქვეყანა გავაერთიანოთ, გავაძლიეროთ.

რა თქმა უნდა, მშვიდობას არ აქვს ალტერნატივა. ჩვენ ყველაფერს ვაკეთებთ უპირველეს ყოვლისა, იმისთვის, რომ მშვიდობა შევინარჩუნოთ. ერთიან, ძლიერ, დემოკრატიულ და ევროპულ საქართველოს ვაშენებთ, რომ ეს იყოს ერთიანი სახლი ქართველებისთვის, აფხაზებისა და ოსებისთვის“, -განაცხადა კვირიკაშვილმა.

პრემიერ-მინისტრის თქმით, შერიგებას ალტერნატივა არ აქვს.

„ამიტომ ჩვენ თვალებში უნდა ჩავხედოთ ერთმანეთს, ყველა სათქმელი უნდა ვუთხრათ და უნდა შევრიგდეთ. შერიგებასაც ალტერნატივა არ აქვს. ჩვენ ერთიან საქართველოში ვიცხოვრებთ და აუცილებლად გავაერთიანებთ ქართველების, აფხაზებისა და ოსების გულებს. არც ქართველებს, არც აფხაზებს და არც ოსებს დასაკარგი შვილი აღარ გვყავს“,- განაცხადა პრემიერ-მინისტრმა.

დღეს აგვისტოს ომიდან 9 წელი გავიდა.