პოლიტიკა

ჩვენი სპეციალისტები იმის გარკვევას ცდილობენ, მოხდა თუ არა კიბერთავდასხმა პარლამენტზე - შალვა ხუციშვილი

შინაგან საქმეთა მინისტრის მოადგილის, შალვა ხუციშვილის განცხადებით, პარლამენტში შესაძლო მომხდარ კიბერთავდასხმაზე უწყება ვითარების გარკვევას ცდილობს, რის შემდეგ გადაწყდება, დაიწყება თუ არა გამოძიება.

„რაც შეეხება საკანონმდებლო ორგანოს, პარლამენტთან დაკავშირებით ოფიციალური შეტყობინება არ ყოფილა, თუმცა საჯაროდ გავრცელებულ ინფორმაციაზე დაყრდნობით, ჩვენი სპეციალისტები პარლამენტის შესაბამის სამსახურს დაუკავშირდნენ და ვითარებაში გარკვევა მიმდინარეობს. პირველადი ინფორმაციის შეგროვების შემდეგ გადაწყდება, თუ რა მოხდა და დაიწყება თუ არა სისხლის სამართლის გამოძიება. გამოძიება დაწყებული არ არის, თუმცა ჩვენი ინიციატივით, პარლამენტს დავუკავშირდით“, - განუცხადა ჟურნალისტებს ხუციშვილმა.

შეგახსენებთ, დღეს გავრცელდა ინფორმაცია, რომ პარლამენტის დეპუტატების ელექტრონულ ფოსტაზე კიბერთავდასხმა განხორციელდა.