კომენტარი

დარწმუნებული ვარ, რომ სანდრა რულოვსი პარლამენტში შევა - რომან გოცირიძე

ნაციონალური მოძრაობის წევრი, რომან გოცირიძე დარწმუნებულია, რომ სანდარა რულოვსი, რომელმაც არჩევნების მეორე ტურში მონაწილეობასა და შესაბამისად, ზუგდიდის მაჟორიტარობაზე უარი თქვა, პარლამენტში პარტიის პროპორციული სიით მაინც შევა.

აღნიშნული განცხადება გოცირიძემ ჟურნალისტის შესაბამისი კითხვის საპასუხოდ გააკეთა.
,,ამაზე საუბარი არ ყოფილა, მაგრამ მე დარწმუნებული ვარ, რომ შევა’’, - განაცხადა გოცირიძემ.
მისივე შეფასებით, მეორე ტურში მონაწილეობაზე უარის თქმა იყო სანდრა რულოვსის პირადი გადაწყვეტილება.

კითხვაზე იყო თუ არა ნაციონალური მოძრაობის პოლიტსაბჭო სანდრა რულოვსის გადაწყვეტილებასთან დაკავშირებით ინფორმირებული, გოცირიძე ამბობს, რომ პარტიის შიდა საქმეებს საჯაროდ არ გამოიტანს.
,,ის რაც არის პარტიის შიდა საქმე, მე არ ვაპირებ იმის საჯაროდ გამოტანას, ზოგიერთების გულის გასახარად’’, - განაცხადა გოცირიძემ.

მისივე თქმით, ნაციონალური მოძრაობა განაგრძობს მეორე ტურში ბრძოლას.

,,ჩვენ ვაგრძელებთ მეორე ტურში ბრძოლას და სანამ არსებობს თეორიული შანსი, ჩვენ შევეცდებით, რომ ბოლომდე გამოვიყენოთ’’, - განაცხადა რომან გოცირიძემ.

ნინო ექვთიმიშვილი