სამართალი

დეკანოზ გიორგი მამალაძის ადვოკატები სააპელაციო სასამართლოს გადაწყვეტილებას უზენაეს სასამართლოში გაასაჩივრებენ

მსჯავრდებულ დეკანოზ გიორგი მამალაძის ადვოკატი, მიხეილ რამიშვილი აცხადებს, რომ დაცვის მხარე სააპელაციო სასამართლოს დღევანდელ გადაწყვეტილებას უზენაეს სასამართლოში გაასაჩივრებს.

როგორც რამიშვილმა ჟურნალისტებს საუბრისას განუცხადა, დეკანოზის უფლებადამცველები ევროპულ სასამართლოსაც მიმართავენ.

„საქართველოში არ არსებობს სასამართლო, ის არის გარდაცვლილი. ქვეყანაში არ არიან დამოუკიდებელი მოსამართლეები. დღევანდელი სააპელაციო სასამართლოს გადაწყვეტილება არის იმ შეკვეთის გაგრძელება, რომელიც პროკურატურაში დაიწყო და საქალაქო სასამართლოში გაგრძელდა. დღეს კოპირება გაუკეთეს სააპელაციო სასამართლოს მოსამართლეებმა პირველი ინსტანციის გადაწყვეტილებას. მინდა ვთქვა, რომ თუ პირადი ინტერესი არსებობს, სამართალი ვერასოდეს იზეიმებს და ყველაფერი კეთდება, რათა მოერგოს გადაწყვეტილება ხელისუფლების ინტერესებს“, - განაცხადა მიხეილ რამიშვილმა.

ცნობისათვის, თბილისის სააპელაციო სასამართლომ ძალაში დატოვა თბილისის საქალაქო სასამართლოს გადაწყვეტილება და დეკანოზი გიორგი მამალაძე დამნაშავედ სცნო განზრახ მკვლელობის მომზადებასა და იარაღის უკანონო შეძენა-შენახვის ბრალში.

გიორგი მამალაძეს 9 წლით თავისუფლების აღკვეთა აქვს შეფარდებული.