საზოგადოება

ჯილეხით დაინფიცირებულმა მოქალაქემ დაავადებული ხორცი სავარაუდოდ, ნავთლუღის ბაზრის მიმდებარე ტერიტორიაზე შეიძინა - სურსათის ეროვნული სააგენტო

სურსათის ეროვნულ სააგენტოში აცხადებენ, რომ მოქალაქემ, რომელიც ჯილეხით დაინფიცირდა, დაავადებული ხორცი სავარაუდოდ ნავთლუღის ბაზრის მიმდებარე ტერიტორიაზე შეიძინა.

როგორც სააგენტოში აცხადებენ, ინფორმაცია დაინფიცირების შესახებ ჯერ დაავადებათა კონტროლის ცენტრიდან, შემდეგ კი უშუალოდ დაინფიცირებული პირისგან მიიღეს.

მათივე ინფორმაციით, მიღებული მონაცემების საფუძველზე, შესაბამისი ღონისძიებები გატარდა აღნიშნული პირის საცხოვრებელ სახლსა და ხორცის რეალიზაციის მითითებულ სავარაუდო ობიექტში.

სურსათის ეროვნულ სააგენტოში ამბობენ, რომ ამჟამად სააგენტო დაავადების გავრცელების ზუსტი წყაროს დადგენის მიზნით სამუშაოებს ახორციელებს.

თბილისში ჯილეხით დაავადების შემთხვევის შესახებ დღეს გახდა ცნობილი.

დაავადებათა კონტროლისა და საზოგადოებრივი ჯანმრთელობის ეროვნული ცენტრის სამეცნიერო საბჭოს თავმჯდომარის, პაატა იმნაძის განცხადებით, პაციენტის მდგომარეობა სტაბილურია და მის სიცოცხლეს საფრთხე არ ემუქრება.