პოლიტიკა

ძალიან ბევრი ადამიანი, რომელიც მანამდე არ იყო საქართველოს მოქალაქე, სწორედ მიხეილ სააკაშვილის პრეზიდენტობის ბოლო რამდენიმე თვეში გახდა საქართველოს მოქალაქე - დავით მათიკაშვილი

საპარლამენტო უმრავლესობის წევრმა დავით მათიკაშვილმა სალომე ზურაბიშვილის მიერ ახალციხეში გაკეთებული განცხადების კომენტირებისას თქვა, რომ მმართველი გუნდის მიერ მხარდაჭერილ საპრეზიდენტო კანდიდატს განსაკუთრებული არაფერი არ უთქვამს.

მათიკაშვილი დაეთანხმა ზურაბიშვილის აზრს, რომ მიხეილ სააკაშვილი თავისი პრეზიდენტობის დროს თურქეთიდან გადმოსულ მოქალაქეებს ანიჭებდა ორმაგ მოქალაქეობას.

„ფაქტი ერთი არის მართლა ის, რაც საზოგადოებას ახსოვს, ბოლო პერიოდში მიხეილ სააკაშვილის პრეზიდენტად ყოფნის, რომ ძალიან ბევრი ასე ვთქვათ მოქალაქეობა იქნა თვითონ მიხეილ სააკაშვილის მხრიდან დარიგებული, ოღონდ რა დამსახურებებით ეს არავინ არ იცის. ძალიან ბევრი ადამიანი, რომელიც მანამდე არ იყო საქართველოს მოქალაქე, სწორედ მიხეილ სააკაშვილის პრეზიდენტობის ბოლო რამდენიმე თვის განმავლობაში გახდა საქართველოს მოქალაქე და ამაზე არავის არ უთქვამს ახსნა, თუ რატომ მოხდა ასეთი მასიური დარიგება საქართველოს მოქალაქეობის. ალბათ, სწორედ ეს იგულისხმა სალომე ზურაბიშვილმა და მეტი არაფერი“, - განმარტა მათიკაშვილმა.

სალომე ზურაბიშვილმა ახალციხეში მხარდამჭერებთან შეხვედრაზე გაიხსენა, როგორ ანიჭებდა მოქალაქეობას წარმოშობით თურქებს მიხეილ სააკაშვილი.

„პრეზიდენტი ანიჭებდა თავისი ნებით მოქალაქეობას, ანუ ერთ დროს, წინა პრეზიდენტი, რომელსაც მე არ ვახსენებ საერთოდ, უხსენებელს ვეძახი, არ ვიცი სომხურად თუ არის ეს სიტყვა. ის ურიგებდა ზოგ თურქ მოქალაქეებს, რომლებიც ჩამოსული იყვნენ ბათუმში, მაგრამ არანაირად დაკავშირებული საქართველოსთან მანამდე. ახლანდელი პრეზიდენტი უარს ამბობს ხშირად და არავინ არ იცის, რა კრიტერიუმებზე დაფუძნებული“, - განაცხადა ზურაბიშვილმა.