პოლიტიკა

ძალიან ცუდი სახელით დარჩებით ამ ყველაფრის შემდეგ ქართველების მახსოვრობაში - სააკაშვილი სალომე ზურაბიშვილის მიმართავს (ვიდეო)

საქართველოს ყოფილი პრეზიდენტი, მიხეილ სააკაშვილი ფეისბუკის პირად გვერდზე სალომე ზურაბიშვილისადმი ვიდეომიმართვას ავრცელებს.

„გასაგებია, რომ რაღაც მიზეზების გამო, თქვენ შეიძლება არ მოგწონდეთ ბოლომდე თქვენი ქვეყანა, გეზიზღებოდეთ მისი დამცველები და ძალიან არ გიყვარდეთ მე, ან ის ხალხი ვინც გაერთიანებულ ოპოზიციას უჭერს მხარს. მაგრამ მე მინდა გკითხოთ, ამ დღევანდელი ბილბორდების გამოფენის ფონზე: საკუთარი თავი მაინც არ გეცოდებათ და არ გიყვართ? პირადი თავმოყვარეობა მაინც არ გაქვთ? თქვენ თავიდანვე თქვით, რომ ხართ დამოუკიდებელი კანდიდატი, პირს არ გაღებინებენ, განცხადებას არ გაკეთებინებენ, ტელევიზორში მაქსიმალურად გზღუდავენ, ყველგან დაყავხართ ესკორტის ქვეშ, რომ რამე არ წამოგცდეთ, ახლა ბილბორდებზე თქვენს მაგივრად გამოფინეს საკუთარი თავები ივანიშვილმა და მისმა ხროვამ. ნუთუ ეს თავის მოჭრა გიღირთ იმ ფასად, რასაც აკეთებთ. ჯერ ერთი, თქვენი კამპანია უკვე დამთავრებულია და თქვენ წაგებული გაქვთ, მეორე - თქვენ ხომ ძალიან ცუდი სახელით დარჩებით ამ ყველაფრის შემდეგ ქართველების მახსოვრობაში. რა ვიცი, მე თქვენს ადგილზე დავფიქრდებოდი, გავემიჯნებოდი ამ ყველაფერს, გადავირჩენდი თავს და გადავარჩენდი საკუთარ რეპუტაციას. მაგრამ მე ალბათ თქვენთვის ცუდი მრჩეველი ვარ, მაგრამ თუ ჩემი არ გჯერათ, კითხეთ თქვენს ახლობლებს, ოჯახის წევრებს, შვილებს ვისაც თქვენთვის კარგი უნდა. მე ნამდვილად არ მშურს თქვენი.“- განაცხადა მიხეილ სააკაშვილმა.