პოლიტიკა

ეკა ბესელიას განცხადებით, მოსამართლეთა დისციპლინური პასუხისმგებლობის განსაზღვრის ნაწილში შეთანხმება პრაქტიკულად მიღწეულია

იურიდიულ საკითხთა საპარლამენტო კომიტეტის თავმჯდომარის, ეკა ბესელიას განცხადებით, მოსამართლეთა დისციპლინური პასუხისმგებლობის განსაზღვრის ნაწილში შეთანხმება პრაქტიკულად მიღწეულია და რამდენიმე საკითხს აზუსტებენ.

ბესელიას განმარტებით, დიდი ხანია მიმდინარეობს რეფორმის მეოთხე ეტაპზე მუშაობა და კონსენსუსის მიღწევა კარგი შედეგი იქნება.

„დღევანდელ შეხვედრაზე შეგვიძლია, მოსამართლეთა დისციპლინური პასუხისმგებლობის საკითხებზე საბოლოოდ შევჯერდეთ და შემდეგ ეტაპზე გადავიდეთ. რაც ასევე მნიშვნელოვანია, ეს არის იუსტიციის საბჭოს სკოლისა და ინსპექტორის საკითხი, ანუ, პროცედურული საკითხები. პარლამენტში საკანონმდებლო წინადადებების სახით რაც მივიღეთ, სამუშაო ჯგუფს გადმოეგზავნება და გადაწყვეტილების მიღება ერთიანად მოხდება“, -თქვა დეპუტატმა.

სამუშაო ჯგუფი სასამართლო რეფორმის ე.წ. მეოთხე ტალღაზე მსჯელობს. შეხვედრა დახურულ ფორმატში მიმდინარეობს, რომელსაც პარლამენტის თავმჯდომარე ირაკლი კობახიძე უძღვება.