პოლიტიკა

ეს არის საქართველოსთვის ძალისმიერად წართმეული რეგიონების მდგომარეობის დაკანონების მცდელობა - გიორგი კვირიკაშვილი ვლადიმერ პუტინის აფხაზეთსი სავარაუდო ვიზიტზე

საქართველოს პრემიერ-მინისტრი გიორგი კვირიკაშვილი რუსეთის პრეზიდენტის, ვლადიმერ პუტინის აფხაზეთში სავარაუდო ვიზიტს გამოეხმაურა.

როგორც კვირიკაშვილმა მთავრობის სხდომაზე განაცხადა, ქართული მხარე საერთაშორისო პარტნიორების მხარდაჭერით ყველაფერს გააკეთებს, რათა მშვიდობიანად დაარეგულიროს რუსეთთან მიმდინარე კონფლიქტი.

„ჩვენს ოკუპირებულ რეგიონებში რუსეთის მაღალი თანამდებობის პირების ვიზიტი და განცხადებები ემსახურება, რა თქმა უნდა, იმ პოლიტიკის გაგრძელებას, რომლის მოწმენიც ჩვენ ვართ. ეს არის საქართველოსთვის ძალისმიერად წართმეული რეგიონების მდგომარეობის დაკანონების მცდელობა და ჩვენ ყველაფერი უნდა გავაკეთოთ, რომ ჩვენი საერთაშორისო პარტნიორების მხარდაჭერით, მშვიდობიან, კონსტრუქციულ რეჟიმში შევძლოთ, რუსეთთან პოლიტიკურად დავარეგულიროთ ჩვენი კონფლიქტი და ოკუპირებული ხაზის ორივე მხარეს მცხოვრები ჩვენი მოსახლეობა შევარიგოთ, გავაერთიანოთ ჩვენი ქვეყანა. ეს არის ჩვენი მთავარი ამოცანა და ამ ამოცანის წარმატებით განხორციელებაში არცერთ ჩვენთაგანს ეჭვი არ ეპარება“, - განაცხადა კვირიკაშვილმა.

РБК-ის ინფორმაციით, რუსეთის პრეზიდენტი ვლადიმერ პუტინი აფხაზეთში 8 აგვისტოს - რუსეთ-საქართველოს ომის მე-9 წლისთავზე ჩავა.

ანა მებურიშვილი