პოლიტიკა

ეს წარმოადგენს ძალიან მტკივნეულ, შეურაცხმყოფელ და მოკლეფეხებიან ტყუილს - გიორგი ბადრიძე სალომე ზურაბიშვილს აკრიტიკებს

საქართველოს დიპლომატთა კლუბის წევრმა, დიდ ბრიტანეთში საქართველოს ყოფილმა ელჩმა გიორგი ბადრიძემ საპრეზიდენტო კანდიდატის, სალომე ზურაბიშვილის განცხადებას, რომ ომის დროს „საქართველოს საელჩოები დადუმებულები იყვნენ“, ტყუილი უწოდა.

ბადრიძის თქმით, 2008 წლის აგვისტოს ომის დროს საელჩოების საქმიანობის შესახებ დეტალური ინფორმაცია საქართველოს საგარეო უწყებას აქვს და მისი გაცნობა შესაძლებელია.

გარდა ამისა ბადრიძემ აღნიშნა, რომ ზურაბიშვილის მიერ საქართველოს აგვისტოს ომის დაწყებაში დადანაშაულება ქვეყნისთვის დამაზიანებელია.

„ეს წარმოადგენს ძალიან მტკივნეულ, შეურაცხმყოფელ და მოკლეფეხებიან ტყუილს. ის, თუ როგორ იმუშავა ქართულმა დიპლომატიამ იმ დღეებში, ყოველგვარი მომზადების გარეშე, რადგან, მოგეხსენებათ, ეს ომი არ იყო წინასწარ მომზადებული და შეთანხმებული. ამის შესახებ საგარეო საქმეთა სამინისტროს დღესაც გააჩნია დეტალური ანგარიში და არ არის რთული იმის ნახვა, თუ ვინ რა გააკეთა.

ღმერთმა დაიფაროს და პრეზიდენტის პირიდან გამოთქმული ამგვარი აზრები პირდაპირი სამართლებრივი შედეგის მომტანი იქნება, ყველაზე დამაზიანებელი ქალბატონი სალომეს განცხადებებიდან არის ომში საქართველოს დადანაშაულება“, -უთხრა ბადრიძემ „რუსთავი2“-ს.

ცნობისთვის, საქართველოს დიპლომატთა კლუბმა სალომე ზურაბიშვილი 2008 წლის ომთან დაკავშირებული განცხადებების გამო გააკრიტიკა, კერძოდ, ქართული ჯარისა და დიპლომატიის შეურაცხყოფის გამო.

დიპლომატთა კლუბმა მოუწოდა საგარეო საქმეთა სამინისტროს, გამოეხმაუროს ზურაბიშვილის ამ განცხადებას და საჯაროდ დააფიქსირონ თავიანთი პოზიცია აღნიშნულ საკითხთან დაკავშირებით.