პოლიტიკა

ევროპის საბჭოს საპარლამენტო ასამბლეის ხელმძღვანელობა მხარს უჭერს საქართველოს ტერიტორიულ მთლიანობას და სუვერენიტეტს _ სოფიო ქაცარავა

საქართველოს საპარლამენტო დელეგაციამ 23-27 იანვარს, სტრასბურგში, ევროპის საბჭოს საპარლამენტო ასამბლეის მუშაობაში მიიღო მონაწილეობა. დელეგაციის წევრები სასესიო და საკომიტეტო მუშაობის პარალელურად მაღალი დონის შეხვედრებს მართავდნენ.

საგარეო ურთიერთობათა კომიტეტის თავმჯდომარემ, სოფიო ქაცარავამ, ევროპის საბჭოს საპარლამენტო ასამბლეაში, ქართული დელეგაციის ვიზიტთან დაკავშირებით კომენტარი გააკეთა. მისი თქმით, დელეგაციის წევრებმა აქტიური მონაწილეობა მიიღეს საპარლამენტო ასამბლეის მუშაობაში, რომლის პარალელურად, ისინი ორმხრივ შეხვედრებს მართავდნენ.

„შეხვედრები გვქონდა ევროპის საბჭოს საპარლამენტო ასამბლეის ხელმძღვანელ პირებთან, რომელთაგან საქართველოს მხარდამჭერი გზავნილები მოვისმინეთ. ისინი, ცალსახად, მხარს უჭერენ საქართველოს ტერიტორიულ მთლიანობას და სუვერენიტეტს“, - განაცხადა სოფიო ქაცარავამ.

მისი თქმით, საქართველოს დელეგაციის მოთხოვნით და ევროპარლამენტარების მხარდაჭერით, ევროპის საბჭოს საპარლამენტო ასამბლეის მიერ მიღებულ რეზოლუციას, დაემატა ჩანაწერი, რომლის თანახმად, ისინი შეშფოთებას გამოთქვამენ რუსეთის ფედერაციის მიერ საქართველოს ოკუპირებულ ტერიტორიებთან ასევე, აფხაზეთისა და სამხრეთ ოსეთის დამოუკიდებლობის უკანონოდ გამოცხადებასთან დაკავშირებით.

სოფიო ქაცარავამ, საქართველოს ვიზის ლიბერალიზაციის მინიჭების თაობაზე, საქართველოს ევროპული სამეზობლო პოლიტიკისა და გაფართოების მოლაპარაკების საკითხებში ევროკომისარის იოჰანეს ჰანის მიერ გაჟღერებულ გზავნილებზეც გაამახვილა ყურადღება. „ვიმედოვნებ, რომ საქართველოსთვის სავიზო რეჟიმის გაუქმებას მალე ვიხილავთ, რადგან საქართველოს მოქალაქეები ამას იმსახურებენ. ისინი ამ პროცესის წარმატებით დასრულებისთვის ძალიან მოწადინებულნი არიან. 2015 წლის დეკემბერში პროცესისთვის ყველა აუცილებელი პირობა შესრულებული იყო. ასე რომ, მალე ევროპის მასშტაბით, ქვეყნისა და მისი მოქალაქეებისთვის ვიზის ლიბერალიზაციის მინიჭება ევროპული მისწრაფებების აღიარება იქნება“, - განაცხადა იოჰანეს ჰანმა.

სოფიო ქაცარავას თქმით, ევროკომისარმა ღრმა და ყოვლისმომცველი თავისუფალი სავაჭრო სივრცის შესახებ შეთანხმების განხორციელებაზეც ისაუბრა და ამ კონტექსტში მან ევროპაში, მთელი რიგი ქართული პროდუქციის ექსპორტის ზრდაზე გაამახვილა ყურადღება. „პირველ შედეგებს უკვე ვხედავთ. ვფიქრობ, ყველასთვის თვალში საცემი გახდება ის გარემოება, რომ ქართველები ევროკავშირს კიდევ უფრო დაუახლოვდებიან“, - განაცხადა იოჰანეს ჰანმა.

საგარეო ურთიერთობათა კომიტეტის თავმჯდომარის თქმით, ვიზიტის ფარგლებში არაერთი ორმხრივი შეხვედრა გაიმართა, რომელთა ფარგლებშიც საქართველოში მიმდინარე პროცესებზეც ისაუბრეს. „მათ უმრავლესობას ამ პროცესებთან დაკავშირებით ინფორმაცია ჰქონდათ თუმცა, ჩვენ, ჩვენი მხრიდან კიდევ ერთხელ გავაცანით ყველა ის დემოკრატიული მიმართულებით გატარებული რეფორმა, რომელსაც ქვეყანა ახორციელებს. მათ ასევე, გავაცანით ჩვენი გეგმები სამომავლო რეფორმებთან დაკავშირებით, რაზეც ევროპის საბჭოს საპარლამენტო ასამბლეიდან სრული მხარდაჭერა მივიღეთ. შეხვედრებისას, ევროპარლამენტარები ხაზგასმით აღნიშნავდნენ, რომ საქართველო მათთვის არის წარმატებული პარტნიორი და ევროპის საბჭოს საპარლამენტო ასამბლეა გააგრძელებს საქართველოსთან ძალიან კონსტრუქციულ თანამშრომლობას“, - განაცხადა სოფიო ქაცარავამ.

საქართველოს საპარლამენტო დელეგაციის შემადგენლობაში, დელეგაციის ხელმძღვანელთან, თამარ ჩუგოშვილთან ერთად, სოფიო ქაცარავა, დიმიტრი ცქიტიშვილი, ნინო გოგუაძე, ირინე ფრუიძე, ზვიად კვაჭანტირაძე, ეკა ბესელია, გიორგი კანდელაკი და გელა მიქაძე შედიან.