პოლიტიკა
ევროპული საქართველოს ინფორმაციით, მარნეულში ე.წ. კარუსელის მცდელობა დაფიქსირდა
„ევროპული საქართველოს“ ერთ-ერთი ლიდერის გიგი უგულავას განცხადებით, მარნეულის 29-ე უბანზე ამომრჩეველი ორი ბიულეტენის ჩაგდებას აპირებდა.
„მოქალაქე შემოვიდა უკვე ბიულეტენით, მერე აიღო ახალი ბიულეტენი და ცდილობდა ორი ბიულეტენის ჩაგდებას. სავარაუდოდ მას ინსტრუქცია ჰქონდა, რომ მეორე უნდა გაეტანათ და ესე დაეტრიალებინათ, მაგრამ როგორც ჩანს აერია. ჩვენმა წარმომადგენელმა ეს დაინახა, აღკვეთა. შემდეგ იყო შეხლა-შემოხლა, რის შემდეგაც ეს ბიულეტენი დახია. ფაქტია, რომ ეს უკვე მეორე შემთხვევაა, განსაკუთრებით, იმ რეგიონებში, სადაც ეთნიკური უმცირესობები ცხოვრობენ. როგორც ჩანს, ხელისუფლებას ძველი, შევარდნაძის ეპოქის „კარუსელის“ გამეორება სურს და ამის მაგალითები უკვე არის“-განაცხადა გიგი უგულავამ.
მისივე თქმით, დარღვევები დაფიქსირდა საბერძნეთში, სალონიკში გახსნილ უბნებზეც.
"მეორე, ასევე სრულიად აღმაშფოთებელი ამბავია საბერძნეთის 37-ე უბანზე, სადაც კომისიის თავმჯდომარემ ქეთევან გონგაძემ ჯეკპოტი მოხსა, ადგა და სადემონტრაციო ოქმში დავით ბაქრაძე გადახაზა, ეს რომ ჩვენმა წარმომადგენელმა დაინახა, მან ეს ოქმი საერთოდ მოხსნა და ნაგვის ყუთში გადაისროლა. ესეც არ არის გასაკვირი ხელისულებისგან იმიტომ, რომ დიასპორაში დავით ბაქრაძის პოზიციები საკმაოდ ძლიერია და შესაბამისად, როგორც ჩანს, ასეთ ტყუილზე და სიბინძურეზე მიდიან, რომ თითქოს ბაქრაძემ მოხსნა კანდიდატურა. ეს სისხლის სამართლის დანაშაულია და მოვუწოდებ ცესკოს თავმჯდომარეს უსწრაფესი რეაგირებისკენ. ბოლოს, მინდა მოვუწოდო ყველას აქტიურობისკენ. აქტივობა უნდა გაიზარდოს",- განაცხადა უგულავამ.