საზოგადოება

გაძლევთ გარანტიას „ბირჟა მაფიას“ ბიჭები ციხიდან გამოვლენ - ელენე ხოშტარია

„ევროპული საქართველოს“ წევრი, პარლამენტარი ელენე ხოშტარია, მუსიკალური ჯგუფის „ბირჟა მაფიას“ მეგობრებს შეხვდა და მათთან ერთად ჯგუფის წევრების დაკავება გააპროტესტა.

ხოშტარიამ პირობა დადო, რომ დაკავებული ბიჭები აუცილებლად იქნებიან გათავისუფლებული და აღნიშნული „უკანონო ქმედება არავის შერჩება“.

პოლიტიკოსი ფიქრობს, რომ გიორგი ქებურიასა და მიშა მგალობლიშვილის დაკავება ვიღაცის პირდაპირი დაკვეთაა.

„პირდაპირ, ვიღაცის დაკვეთით გაკეთებული ადამიანის დაშინებაა იმიტომ, რომ ვიღაცას რაღაცა არ მოეწონა. მსგავსი რამე, პირველ რიგში, დაუშვებელია და ეს ადამიანები ჩვენ ციხიდან უნდა გამოვიყვანოთ აუცილებლად. არავის არ ეგონოს, რომ ტალღა ჩაცხრება და ვიღაცას გადაავიწყდება. ბოლომდე მივიყვანთ ამ საქმეს. გარანტიას ვაძლევ ყველას, ვინც ახლა უყურებს ამას და ვინც ეს გადაწყვიტა, - გაძლევთ გარანტიას, რომ ეს ბიჭები ციხიდან გამოვლენ“,-აღნიშნა ხოშტარიამ.

„ბირჟა მაფიას“ წევრებს - გიორგი ქებურიასა და მიშა მგალობლიშვილის წინასწარი პატიმრობა შეეფარდათ. გამოძიება მათ ნარკოტიკული საშულების შეძენა/შენახვას ედავება.

დაკავებულების ადვოკატები მიიჩნევენ, რომ მგალობლიშვილის და ქებურიას დაკავება, მათ მიერ გადაღებულ ვიდეო კლიპს უკავშირდება.

მონიკა დავლიანიძე