პოლიტიკა

გიორგი აბაშიშვილის ინფორმაციით, ხვალ პარლამენტის შენობაში პრეზიდენტის სამუშაო ოთახში პრეზიდენტის ადმინისტრაციის წარმომადგენლებს არ შეუშვებენ

საქართველოს პრეზიდენტის, გიორგი მარგველაშვილის ადმინისტრაციის უფროსი, გიორგი აბაშიშვილი აცხადებს, რომ ხვალ ქუთაისში, პარლამენტის სასახლეში, პრეზიდენტის სამუშაო ოთახში პრეზიდენტის ადმინისტრაციის წარმომადგენლებს არ შეუშვებენ.

როგორც აბაშიშვილმა ჟურნალისტებს განუცხადა, შესაბამისი ინფორმაცია მათ პარლამენტის აპარატიდან მიიღეს.

პრეზიდენტის ადმინისტრაციის უფროსი იმედოვნებს, რომ ადგილი აქვს გაუგებრობას.

„მოგეხსენებათ, ხვალ საქართველოს პარლამენტში არის მოტივირებული შენიშვნების განხილვა.

საქართველოს პრეზიდენტის დავალებით, მე, უშიშროების საბჭოს მდივანი, პრეზიდენტის საპარლამენტო მდივანი და მრჩეველები მივემგზავრებით ქუთაისში ამ განხილვაზე. დღეს ჩემს თანამშრომლებს დაურეკეს საქართველოს პარლამენტის აპარატიდან და უთხრეს, რომ ჩვენ არ შეგვიშვებენ პრეზიდენტის სამუშაო ოთახში. მე ვნახე კონსტიტუციის მოქმედი რედაქციაც და პროექტიც, არსად არ წერია, რომ პრეზიდენტს უფლება არ აქვს, საკუთარი ადმინისტრაციის უფროსი, მაღალი თანამდებობის პირები არ შეუშვას საკუთარ სამუშაო ოთახში. შესაბამისად, იმედი მაქვს, რომ გაუგებრობასთან გვაქვს საქმე და ეს საკითხი მოგვარდება. ჩვენ ნამდვილად ვაპირებთ პრეზიდენტის სამუშაოს ოთახში შესვლას და შესაბამისი სამუშაო პირობების შექმნას", - აღნიშნა აბაშიშვილმა.

ნინო ექვთიმიშვილი