საზოგადოება
`გირჩი` და მოძრაობა `თეთრი ხმაური ` მარიხუანას მოხმარებაზე ახალი რეგულაციების შემოღებას აპროტესტებს
მარიხუანას მოხმარებაზე ახალი რეგულაციების შემოღებას "გირჩისა" და მოძრაობა "თეთრი ხმაურის " წევრები აპროტესტებენ.
პოლიტიკურ ცენტრში თვლიან, რომ კანონპროექტს დახვეწა სჭირდება და ბევრი სადავო საკითხია მასში.
საუბარია შსს-ს მიერ მომზადებულ კანონპროექტზე, რომელიც უკვე მზად არის და კანონპროექტი მთავრობას რამდენიმე დღეში წარედგინება. "გირჩში" აცხადებენ, რომ ახალი რეგულაციები მხოლოდ პრობლემებს შექმნის.
„მე ყველაფერი არ მომწონს, არ მომწონს მაგალითად პროფესიული შეზღუდვები. არ მომწონს ის რომ მაგალითად მძღოლზე, რომელიც არაფხიზელ მდგომარეობაშია უნდა გავრცელდეს სისხლის სამართლის პასუხისმგებლობა. ეს იქნება საშარო ამბავი და შს სამინისტროს და ქართველ ხალხს ეს არაფერს კარგს არ მოუტანს. ასეთი დახვეწა ამ კანონპროექტს დასჭირდება,“- ამბობს ”ახალი პოლიტიკური ცენტრი - გირჩის” პოლიტიკური საბჭოს წევრი იაგო ხვიჩია.
გარკვეულ რეგულაციებს მხარს უჭერს, მოძრაობა ”თეთრი ხმაურის” აქტივისტი დავით სუბელიანი, თუმცა მისი თქმით, ხელისუფლება რეფორმას ვერ ატარებს და მხოლოდ საკონსტიტუციო სასამართლოს გადაწყვეტილების შემდეგ ცდილობს რეგულაციების დაწესებას.
როგორც სუბელიანი ამბობს, ეს მხოლოდ იმაზე მეტყველებს, რომ მარიხუანას მოხმარების ლეგალიზებასთან დაკავშირებით ხელისუფლებას პოლიტიკური გადაწყვეტილება არ აქვს მიღებული.
„შსს და სახელმწიფო კვლავაც რჩება იმ ტიპის მოთამაშედ, რომელიც მხოლოდ მცირე ცვლილებებს ახორციელებს. ამ შემთხვევაში საკონსტიტუციო სასამართლომ მიიღო გადაწყვეტილება და ახლა სხვა გზა არ დარჩათ, რაღაც რეგულაციები უნდა მიიღონ. როდესაც რეფორმას ვერ აკეთებენ და მხოლოდ ამაზე ფოკუსირდები, ეს მეტყველებს იმაზე, რომ პოლიტიკური გადაწყვეტილება ,,ქართულ ოცნებას“ კვლავაც არ აქვს მიღებული"-ამბობს სუბელიანი.