პოლიტიკა

ჰერბერტ ზალბერი პერსონა ნონ-გრატად უნდა გამოაცხადონ - სალომე ზურაბიშვილი

დამოუკიდებელი დეპუტატის, სალომე ზურაბიშვილის თქმით, ევროკავშირის სპეციალური წარმომადგენლის სამხრეთ კავკასიასა და საქართველოს კრიზისების საკითხებში ჰერბერტ ზალბერის ბიბილოვისადმი გაკეთებული განცხადების გამო, საქართველოში ის პერსონა ნონ-გრატად უნდა იყოს გამოცხადებული.

„ევროკავშირის სპეციალურ წარმომადგენლის სამხრეთ კავკასიისთვის და ჟენევის თანათავჯდომარის, ჰერბერტ ზალბერის განცხადება არა მხოლოდ პრინციპულად მიუღებელია, არამედ საკითხის მიმართ მის უცოდინარობას ავლენს.

ასეთ შემთხვევაში ჩვენ არ უნდა მორჩილად დაველოდოთ ბრიუსელის რეაგირებას ან რამე მობოდიშებას, არამედ დროულად მოვითხოვოთ მისი უკან გაწვევა... დიპლომატიას თავის მკაცრი წესები გააჩნია და ამ შემთხვევაში ჰერბერტ ზალბერმა დაარღვია საქართველოს სუვერენობის პრინციპი და ქვეყნის ინტერესებს ზიანი მიაყენა.

ამას ერთი პასუხი აქვს: "პერსონა ნონ გრატა"-დ გამოცხადება...

ეს იქნება სწორი გადაწყვეტილება და ყველასყვის გაფრთხილება“, - აცხადებს სალომე ზურაბიშვილი.

შეგახსენებთ, რომ ჰერბერტ ზალბერი გუშინ ოკუპირებული სამხრეთ ოსეთის ე.წ. პრეზიდენტ ანატოლი ბიბილოვს შეხვდა და მას ე.წ. საპრეზიდენტო არჩევნებში გამარჯვება მიულოცა. ამის გამო საქართველოში ევროკავშირის ელჩი იანოშ ჰერმანი საგარეო საქმეთა სამინისტროში დაიბარეს.

ანა მებურიშვილი