სამართალი

ირაკლი სესიაშვილის შვილის მეგობარი მისი ავტომობილის ქურდობასთან დავით სესიაშვილის კავშირს აბსურდულს უწოდებს

საპარლამენტო უმრავლესობის წევრის, ირაკლი სესიაშვილის შვილის მეგობარი, ნიკოლოზ სანაია მისი ავტომობილის ქურდობასთან დავით სესიაშვილის კავშირს აბსურდულს უწოდებს.

როგორც სანაიამ ჟურნალისტებს განუცხადა, დავით სესიაშვილი მისი ახლო მეგობარია და არ არის გასაკვირი, რომ მანქანაზე მისი თითის ანაბეჭდებია დაფიქსირებული.

„სესიაშვილის გარდა მანქანაზე რამდენადაც ვიცი სამი თუ ოთხი ადამიანის თითის ანაბეჭდი აღმოაჩინეს. გასაკვირიც არ არის, ყოველდღიური ურთიერთობა ვისთანაც მაქვს, იმის თითის ანაბეჭდები იქნებოდა. დავით სესიაშვილი იმ პერიოდში არ დაუკითხავთ და არც იყო დასაკითხი, - განაცხადა ნიკოლოზ სანაიამ.

ცნობისათვის, გუშინ „ნაციონალური მოძრაობის“ პოლიტსაბჭოს წევრმა კოტე იოსელიანმა განაცხადა, რომ 2015 წელს მომხდარი ავტომობილის ქურდობის საქმეზე სავარაუდო დამნაშავის თითის ანაბეჭდი ემთხვევა დეპუტატ, ირაკლი სესიაშვილის დავით სესიაშვილის თითის ანაბეჭდს.

ნაციონალური მოძრაობის ბრალდების პასუხად თავდაცვისა და უშიშროების საპარლამენტო კომიტეტის თავმჯდომარემ პროკურატურას საჩივრით მიმართა.

ნინო ექვთიმიშვილი